جوزك على ما تعوديه.. مش بشيل عندى الديسك

فى كده اتجاه عام بترك كل المسئوليات على الزوجة بأية حجة بقى ممكن تيجى فى دماغه..

عاوزين نغير حاجات فى الأوضة ممكن لو سمحت مساعدة؟ مش حقدر أشيل معاكم معلش عندى الديسك.. ألف سلامة حضرتك بس أنا كمان عندى حاجات كتير وبشيل عادى. 

لو سمحت ممكن مساعدة فى مذاكرة الأولاد علشان مش لاحقة؟ معلش مش حقدر علشان لما بذاكر لهم بتعصب أنهم مش فاهمين وعلاقتى بتتوتر بيهم.. طب بالنسبة لى كأم علاقتى انتهت بيهم ومستمرين عادى؟ ده ساعات الجيران ممكن يطلبوا البوليس لفض الخناق!!

لو سمحت محتاجين مساعدة فى توصيل المدرسة؟ معلش مش حينفع علشان عندى ميتينج الصبح بدرى، طب ممكن ترجعهم؟ لا عندى جيم، طب إيه حضرتك؟ 

 على فكرة بقى احنا بنشيل وعندنا الديسك، وبنذاكر وعلاقتنا بتدمر بالعيال، وبنوصل المدرسة والتمارين واحنا تعبانين ومعندناش وقت وبنشتغل ونطبخ واحنا عيانين عادى بردو... الحياة مشاركة يا أساتذة والدنيا مأزمة على كل الأطراف فنساعد بعض شوية ذوق معايا الجوازة.