جوزك على ما تعوديه.. آه اكذب مفيش مشكلة

انتى أحلى واحدة فى الكون، على فكرة انتى خسّيتى، انتى رقيقة أوى، أكلك جميل، شكلك خطير.. كل الكلام ده نحب نسمعه على فكرة.

حتى ولو بتكذب يا سيدى احنا موافقين ومتصالحين مع نفسنا بس قوله، المهم إنك تقوله.

فى ساعات كتيرة جدًا الكذب فيها بيكون لصالحك ولصالح الحياة الزوجية. وبعدين فيها إيه يعنى لمّا تقول كلام وهو مش حقيقى اعتبرها مجاملة للسّت اللى معاك، يعنى هى حتحلفك على المصحف إنها خسّت؟ ما هى عارفة كويس هى واكلة إيه على الغدا، ولو شاكة أوى عندها الميزان تقدر تتأكد لو عاوزة. الفكرة إنها بتبقى عاوزاك تقول لها الكلام بشكل معين وفى توقيت معين.

الصراحة فى الحاجات دى مش بتأكّل عيش؛ بل بالعكس ممكن تؤدى بيك الى التهلكة.

وبعدين ما هى طول النهار عمّالة تكذب عليك، يعنى إنت بتصدّقها لمّا تروح الچيم مرتين ثلاثة وتقعد هى تتغزل فى جمال عضلاتك، بذمتك فى عضلات بتبان بعد مرتين چيم؟ اشمعنا الكذب حلو ساعتها؟  صدّقنى مثل هذه النوعية من الكلام لا تعد كذبًا، فأنا لا أكذب لكنى أتجمَّل.