جوزك على ما تعوديه.. شوية تقدير
رغدة أبورجب
طبعًا الكلام هنا لكَ عزيزى الرجل، إحنا معشر الستات بنتعب أوى، والله العظيم بنتعب جدًا، وبنعمل مجهود جبار ما بين الولاد والبيت والشغل، ده غير المجهود المبذول للحفاظ عليك أنت شخصيًا عزيزى الرجل، أيْوَه متستغربوش إحنا بنعمل مجهود كبير للحفاظ عليكم من حاجات كتيرة أوى بيتعرض لها الزوج المخلص الوفى من نزوات وأزمات وحاجات كتيرة محتاجة سلسلة مقالات.
فا احنا دائمًا تحت ضغط عصبى كبير، تحس إننا بنحاول نجمع ما بين كل الأدوار ويا ريته عاجب!
طبعًا بيحصل تقصير لأننا مش بطلات خارقات بَس بنحاول.
فا علشان كده دائمًا بنحب نسمع كلام تشجيعى وتقديرى فى نفس الوقت، صدقنى الكلام ده مش علشانا خالص؛ ده علشان مصر، قصدى علشان نعرف نكمل الحياة.
التقدير حلو اسمع منّى، ولمّا تقدّرنى أكيد ح قدّرك وحرفع من شأنك وإن شاء الله حنعيش عيشة فُلة كلنا.
ولمّا بطلب هنا التقدير ده مش معناه إنك مش بتعمل مجهود أو تَعبان فى حياتك ومُعاناتك الدايمة مع الشغل؛ أبدًا أنا هنا بطلب منكم التقدير لزوجاتكم الأعزاء علشان الدنيا صعبة فعلاً معاهم، وإحنا كستات بيفرق معانا أوى إنك كرجل تعرف وتقدّر المجهود الجبار اللى بنعمله، وكلمة التقدير بتاعتك بتكون مهمة.
فا شوية تقدير عزيزى الرجل مهمين ليك قبل ما يكونوا مهمين لزوجتك العزيزة، وده علشان تنعم بحياة أسرية سعيدة ولطيفة.
