جوزك على ما تعوديه.. الفرق بين الراجل والست لما بيزعلوا
رغدة أبورجب
طريقة تعبير كل واحد فينا عن زعله بتختلف، فا مثلا إما الرجالة بتزعل بتنزل من البيت، تخرج، تلف بالعربية، تروح القهوة تلعب بولة استيميشن تعمل أى حاجة خارج الروتين اليومى بتاعها ده بيخلص الموضوع معاهم نهائيا وبيرجعوا البيت بعدها فلة ومفيش أى آثار للخناقة.
أما إحنا معشر الستات بنختلف نهائيا عنكم وبيستفزنا جدا فكرة «أنا حسيبك شوية علشان تهدى وًنتكلم»
حضرتك أنا مش كيكة علشان تسيبنى أهدى وبعدين نتكلم، فى أكتر من طريقة تقدر تتكلم بيها وتهدى الأمور غير إنك تقرر تنزل علشان المدام تهدى وتقدروا تتكلموا.
فين الدلع، فين الكلام الحلو، إيه بقى غالى هو كمان؟
خليك ذكى انزل وأنت راجع هات معاك ورد يبقى كده ضربت عصفورين بحجر واحد، لكن تنزل وتسيبها بحجة أنها عصبية يبقى بتلعب فى عداد عمرك.
لكن الحرفنة إنك تقدر تسيطر على انفعالها وًتوترها بذكاء وده عن طريق الكلام الحلو والدلع وتخلص الأمور.
مش كل الأمور بتتحل بالمنطق، فى أمور كتيرة مع الستات ممكن تخلص بكلمتين حلوين.
