جوزك على ما تعوديه.. هى الرجالة عاوزة إيه؟!

ده سؤال لو عرفناه نبقى عُمَد.. دى حاجة احتار فيها العلماء..

طبعًا أنا بهرّج.. الرجالة دول كائنات سهلة وبسيطة وغير محيرة بالمَرّة..

هو بيبقى بَس متحير من البداية يتجوز ولاّ لأْ وبَعدين ياخد القرار..

وتبتدى بنت حواء الرحلة الطويلة مع ابن آدام..

هو بسيط صدّقونى وطلباته سهلة جدًا.. هو مش عاوز حد يصحيه من النوم ولا يشغل تفكيره بهراء (بالنسبة له) أى حاجة ما عدا الكورة وأصحابه وأحيانًا أولاده وطبعًا أسرته ووالدته..

بيكون عاوز يقعد على القهوة ويخرج مع أصحابه بدون ما حد يقول له رايح فين أو راجع من فين..

طبعًا مش بيحب حد يقول له هات فلوس، معروفة دى مش محتاجة أقول لها ولا حتصير من فين ولا مصروف البيت مش مقضى. دى كلها مشاكلك الشخصية حليها بالطريقة اللى تناسبك دون إزعاجه وهو على فكرة مش حيعترض فى الأغلب على حلولك..

وأكيد مش عاوز يقعد فى نكد وزعيق، يعنى مشاكلك فى مذاكرة العيال حليها بعيد عنه..

طبعًا بيحب الأكل الحلو الطعم اللذيذ زى بتاع مامته اللى عمرك ما حتعرفى تعملى شبهه.. فا متغلبيش نفسك واعترفى بفشلك..

وطبعًا تليفونه خاص بيه هو بَس ولا انتى ولا أولادك ليكم أى دعوة بيه ولا طبعًا بباسبورده..

يعنى اختصارًا ياكل وينام ويخرج فى هدوء، شوفتوا هدوء وسَكينة أكتر من كده..

مش بقول لكم كائنات سهلة وبسيطة ومتطلباتهم أسهل منهم.. وللحديث بقية.