جوزك على ما تعوديه.. كأس العالم فى الخناقات الزوجية

هنا بيكون كل واحد همه إثبات أنه على حق بالأدلة والبراهين وكل طرف عنده استعداد أنه يعمل أى شىء علشان يثبت صحة موقفه، وطبعا كل حاجة بتبقى مسموحة فى المعركة.

لا يا جماعة هى مش بطولة ولا منافسة، الهدف مش إلحاق الهزيمة بالطرف الآخر وأخذه كأسير إحنا مش فى حرب.

الشطارة هى إنك تطلع من الخناقة بدون إلحاق أى أذى بالطرف الآخر وتوضيح وجهة نظرك بأسلوب مقبول ومهذب.

إحنا مش بنرتبط علشان نتخانق أو نثبت إننا صح، إحنا بنرتبط علشان نعيش حياة حلوة وجميلة فيها مودة ورحمة.

اللى بيشوف نفسه زعل التانى يصالحه واللى يشوف إنه مضايق من حاجة يقولها ويشرحها ومش لازم أنها تكون حاجة كبيرة علشان تضايقك، الموضوع ده نسبى جدا وبيختلف من شخص لآخر، اتكلموا واتصافوا. بلاش نشيل من بعض، بلاش نقعد بالأيام منكلمش بعض علشان خناقة أو موضوع بسيط حلوا المواضيع أول بأول، اتعلموا إزاى تتناقشوا وإزاى تعتذروا لبعض، ثقافة الاحتواء مهمة جدًا لأن فى وقت المواضيع بتنحل بالاحتواء خصوصا مع الزوجات، بلاش العند والمكابرة.

الحاجات دى بتكبر المواضيع

من أهم شروط الخناقة الاحترام وعدم التجاوز نهائيا لأن بعد مرور الخناقة محدش بيفتكر سببها ولكن بيفتكروا الإهانة اللى حصلت بسببها ودى بتكون المشكلة الأكبر. 

الجواز مشاركة ومودة ورحمة وسكينة مينفعش إننا نحوله إلى ساحة معركة ونشوف مين فينا الكسبان، الهدف أن كل واحد يعرف إيه اللى بيضايق الطرف الآخر وميعملوش ويحافظ على مشاعره.

اهدوا على بعض والتمسوا الأعذار لبعض وبلاش نظام الكسبان والخسران كلنا فى مركب واحدة.