حلاوة العنتبلى

كمال بيحب نورا وراح يطلب إيديها من باباها، ضرب الجرس ففتحله السفرجى ودخّله فى الصالون وشوية وباباها نزل بس كمال معرفوش وقاله إنه عايز حلاوة بيه العنتبلى.

فرد عليه قائلاً: إحنا يا بنى حلاوة بيه العنتبلى

وهنا انتفض كمال وفّز وقف وهو مرعوب   وقاله إنه جاى يخطب بنته فحلاوة بيه قاله بقرف:

- إنت قلتلى بتشتغل ايه؟ عميد مدير أستاذ ؟ - لا يا عمى أنا زميلها ...فزغده وقاله:

- تلميذ يعنى؟ وبعدها داس بنزين وابتدى يحرق أسئلة:

- وأهلك مجوش معاك يخطبوها ليه، لازم والدك مشغول؟ وسأله: صاحب أملاك؟ عندكم أراضى مصانع عمارات فرد كمال لا يا عمى احنا بتوع قانون 83، أنا والدى موظف، فبص له بنظرة تحقير وقاله:

- موظف؟!! بيشتغل إيه؟ فقاله مُحضر

وهنا اتقلبت الدنيا وحلاوة بيه كشر عن أنيابه وقاله أنت سمعت عن حلاوة العنتبلى؟! ومن لخبطة كمال قاله:

- لأ مسمعتش عنه أصلى لامؤاخذة مبقعدش على قهوة

فرد عليه  وقاله الجملة التاريخية الماستر سين فى الفيلم:

- طيب يا أخويا أحب أعرفك بقى بحلاوة بيه العنتبلى، إحنا ولا فخر مليونجى، عم الجزارين، ملك اللحمة..عارف هى إيه اللحمة؟

وهوپ مسح حلاوة بيه بكرامة كمال الأرض وقاله إنه جاى طمعان فى القرشنات والتانى يدافع ويقوله لا يا عمى أنا بينتظرنى مستقبل باهر. بغض النظر عن الفارق الرهيب بين كمال ونورا وإن أبوها دخلها كلية الطب علشان الناس تقوله الدكتورة راحت والدكتورة جت..هل ترضى تجوزى ابنك أو بنتك لحد أقل منهم مادياً لو بيحبوا بعض ولهم مستقبل؟

فيلم على باب الوزير طرح الفكرة دى والليّ من رد حلاوة بيه واضح إن ده شىء مرفوض، هل التكافؤ المادى والاجتماعى مطلوب حتى لو كان فى مستقبل باهر ينتظر أحد الأطراف؟ من الآخر هل الفلوس كل حاجة ولا مش كل حاجة؟

اللى بيقولوا الفلوس مش كل حاجة وجهة نظرهم إن الدنيا لا تستقيم بالمادة فقط وإن فى حاجات فى الدنيا مهما ملكنا من الفلوس مش هنقدر نشتريها زى الحب والصحة وراحة البال، هم شايفين إن الفلوس حاجة بتخلينا نعيش كويس بس مش هدف فى الدنيا نعيش علشانه، الفلوس بتروح وتيجى بس الأصل الكويس والمعاملة المحترمة هى الليّ بتفضل.

أما الليّ بيقولوا إن الفلوس مهمة بقى شايفين جزء تانى من القصة، وهى إن الفلوس مش شرط سبب مباشر للسعادة بس هى بتجيب حاجات بتجيب سعادة أو بتبعد تعاسة ومشاكل.

يعنى الفلوس بتخلى الناس تصرف وتعيش وتسافر وتجيب بيوت وتتجوز وساعات تطلق كمان - توافر الأمان المادى قد لا يكون سبب مباشر للسعادة ولكنه أكيد عامل مباشر لمنع التعاسة والشقا.

لو نورا بنتكم تجوزوها كمال ولا تعملوا زى حلاوة بيه العنتبلى؟