لمّا الشتا يدق البيبان
منى رضوان
لمّا الشتا يدق البيبان.. بنتخن ومبنعرفش ندخل فى هدومنا ولا بُقّنا بيتوقف عن المَضغ والبلع، فصل الشتا من جوانبه القاسية فى رأيى غير البرد هو أن الإنسان ممكن عادى جدًا يجيب كرسى ويقعد قدّام التلاجة وياكل لحد ما يصل لمرحلة إنه بيتحشر فى هدومه. يتحول الشعب لكتل بشرية بتاكل من ساعة ما تفتح عينها لحد ما تنام.
مصر بلد مش برد زى أوروبا، لكن بيوتنا كلها مصصمة بلا شبكات تدفئة مركزية وعلشان كده بنعوّض الإحساس بالبرد بالبطاطين واللاكاليك والأكلات والمشروبات المصرية الشتوية الأصيلة زى:
- شوربة العدس بالعيش المحمص، ودى بلا شك من أجمل أكلات الشتا (وأنا بحبها صيف شتا)- تتميز بقوامها التقيل ومكوناتها الغذائية الجميلة، فى ناس بتعملها بالجزر والبطاطس كمان.
- البطاطا المشوية، ودى بتبقى من معالم الشتا فى مصر، عربياتها منتشرة فى كل حتة وتجيب ريحتها من على بُعد ولها ريحة دخان مميزة، الفرن بتاعها ممكن يكون حطب أو فحم وطبعًا فى ناس بيحبوها بالسكر اللى زى الشربات فوقها أو بياكلوها مشوية فقط.
- القلقاس، وده خضار أو يصنف من الدرنيات (أخو البطاطس شوية) ومعروف إنه بيتقطع مكعبات وبيتعمل بالسلق الأخضر والكزبرة، تاكله من هنا والدفا يعم كافة أرجاء جسمك.
- السحلب، مشروب شعبى شتوى أصيل، موجود فى مصر وفى بلاد الشام وهو أصلاً نبات بيتم طحنه وعمله كمشروب سخن باللبن مع إضافات تجعل منه وجبة مش مشروب. بيتعمل بالسكر والنشا وجوز الهند والسمسم وبعض الناس بتزينه بالمكسرات والزبيب.
- حمص الشام أو زى ما بنسميه «الحلبسة»، وده مشروب سخن مكون من حمص مستوى، بيتطبخ فى صلصلة خفيفة أوى وبيتعمل بالتوم والبصل، الناس بتاكل الحمص بالمعلقة وتشرب الميّة، عادة بيتقدم معاه طبق فيه ملح وفلفل وكمون علشان الناس يحدّقوه زى ما يفضلوا وطبعًا الليمون جزء أساسى منه وبيديله طعم جميل.
- البليلة، ودى عبارة عن قمح مسلوق كامل الحبة وبينفش ويتحط فى اللبن، فيها جوز الهند والسكر والمكسرات اللى بيزّينوا به البليلة اللى بتتاكل سخنة.
- أبوفروة، ودى متصنفة فاكهة ومعروفة فى البلاد العربية بالكستناء، فيها فيتامينات زى الماغنيسيوم والكالسيوم والحديد والبوتاسيوم، وهى من الأطعمة اللى بتمد الجسم بالطاقة وبتدفيه. اسمها الدارج أبوفروة وسبب الاسم إن لها قشرة صلبة تحتها قشرة ناعمة الملمس كالفرو.
بتتعمل بسهولة وده عن طريق إننا نعمل شقوق طولية على الثمرة بالسكينة ونحطها فى صينية جُوّا الفرن لمدة ٥ دقايق لحد ما تستوى وتتقشر بسهولة. معروفة فى بلاد زى تركيا وبتتشوى فى الشارع وأكلها ممتع.
أعتقد بعد كمية الأكلات الشتوية دى لازم نتواصل مع الفنان على الحجار ونقوله إننا لمّا الشتا بيدق البيبان بنتخن ومش بس بتنادينا الذكريات احنا كمان بتنادينا التلاجات.
