باب النجار.. مخّلع

كان فى نجار معروف عنه مهارته وإتقانه للعمل فى بناء البيوت الخشبية الليّ كانت منتشرة فى أوروپا.

كان بيستعمل مواد جيدة تخلى البيت صامد فى الأجواء الجوية الصعبة والبرد والمطر والتيارات الهوائية القوية.

النجار ده كان بيشتغل عند صاحب أعمال شهير، كسب من وراه فلوس كتير لمدة سنوات طويلة.

وفى يوم من الأيام قرر النجار أن يتقاعد لأنه كبر فى السن وبقى عايز يقضى وقت أكبر مع أسرته وأولاده.

راح لصاحب العمل يقوله على قراره فالراجل مرضيش وقاله مش هسيبك إلا لما تبنى ليا منزل خشبى كمان وبعد شد وجذب بينهما اتفقا أن البيت ده هيكون آخر منزل يبنيه النجار لصاحب العمل.

النجار قرر أن المرة دى ميبنيش بيت زى بيوته المتينة السابقة علشان صاحب العمل يسيبه يمشى وميطلبش منه حاجة تانى، وبالفعل استخدم خشب مش كويس ومسامير مصدية وألوان رديئة وكروت كل الشغل آخر كروتة وخلص البيت فى ربع المدة المعتادة.

وفى يوم تسليم البيت لصاحب العمل جه النجار وإداله المفتاح فقاله صاحب العمل أن البيت ده هدية له تقديرًا لتفانيه وأمانته طول فترة شغله معاه.

صعق النجار من الموقف.. وما هى إلا شهور قليلة وجه الشتا وبدأ البيت يتهالك وتقع حتت منه لحد ما الباب نفسه وقع بسبب الخشب الردىء وبدأ الناس يقولوا جملة: باب النجار مخلع كناية عن بيت النجار المتهالك.

هل حقيقى باب النجار مخلع؟ هل فى أمثلة من الحياة على كده؟ هل فى ناس مهنتهم مش منعكسة عليهم؟ أعتقد أيوه:

- دكتور السنان الليّ سنانه محتاحة اهتمام أو الليّ مبيعملش أى شىء من النصائح الليّ بيقولها لمرضاه، ودكتور الدايت الليّ محتاج دايت وعنده طباع غذائية محتاجة تتغير. أو أى طبيب لا يعالج نفسه.. بابه مخلع.

- اللايف كوتش أو الطبيب النفسى الذى يعانى من المشاكل الليّ بيساعد الآخرين إنهم يتخلصوا منها.. بابه مخلع. - الأفراد الليّ بيشتغلوا فى حاجات لها علاقة بالتعاون مع الناس سواء علاقات عامة أو تعامل مع أفراد كتير وهم ليس لهم أى علاقات جيدة بالآخرين وبيتكلموا كتير عن أهمية أن يكون بين الناس communication كويسة وهم مش كده بالمرة.. دول كمان بابهم مخلع.

- وأخيرًا أعتقد أكتر ناس بابهم مخلع هم من يطلقون الشعارات الرنانة عن الوفاء والاهتمام والحب غير المشروط أو القدوة - الليّ بيصدعونا بكلام مجعلص عن أهمية المُثل والقيم وبيتفزلكوا فى كل مناسبة أو من غير مناسبة عن قيمة الإنسان وهم أول ناس لا يفعلون أى شىء مما يقولون.. زهقتونا وخنقتونا وبابكم مخلع بالثُلث.

صدق المثل الليّ قال: باب النجار مخلع وهو مثل حقيقى بنشوف منه وشوش كتير.. والليّ ميعجبوش المثل ده نخش عليه بواحد أقوى: ابن الإسكافى حافى.