جوزك على ما تعوديه..أنا مش شريكة فى السوبر ماركت
رغدة أبورجب
أنا من موقعى هذا أحب أؤكد لكل زوج مصرى أصيل أننا كزوجات مش شركاء فى أى من محلات السوبر ماركت، وإننا بنروح بس علشان نجيب طلبات البيت اللى إنتوا عوزنها، وإننا ممكن عادى نقضيها عيش وجبنة عادى.
تلاقى الزوج أول لما يسمع أن مراته نازلة السوبر ماركت يجيله حالة من حالات كرشة النفس المصاحبة بالغثيان ويبقى يا ولداه حيموت. حضرتك إحنا فعلا مش مشاركين ولا عندنا أسهم فيه.
وبعدين بيكون فى حالة من حالات العشم الزايد، تلاقى الزوج عنده إحساس أن الفلوس اللى بعتها معاها المفروض تجيب السوبر ماركت كله وكمان ممكن يفيض منها ونشترى بيها شهادات استثمار.
حضرتك مش بتشوف تليفزيونات ومش بتسمع أخبار وعارف أن كل حاجة غليت عالميا، إشمعنا بقى لما أقول لك على السوبر ماركت يبقى لا.
عجبا منكم إيها الأزواج.
وعلى فكرة المشوار ده تقيل جدا على أغلب الستات ومعندناش أى مانع أنكم تقوموا بالمهمة دى بالنيابة عننا. وتلاقى بقى الزوج من دول نزل السوبر ماركت وخلص مصروف البيت فى أى كلام مش محتاجينه أساسا، عرض.
على الشكولاتة وعرض على البونبوبى حضرتك إحنا أصلا بنعمل دايت ومش بنجيب الحاجات دى، لكن لما تيجى منه يبقى عادى لكن لو إحنا تبقى واقعة سودا.
اختصارا مشوار السوبر ماركت مشوار مهم ومجهد جدا، وإحنا كستات بنحاول ندبر علشان نشترى أغلب احتياجتنا بمبلغ معقول فا يا ريت بقى نبطل الكلام من نوعيه كل ده ومجبتيش كذا كل ده دفعتيه ليه.
