جوزك على ما تعوديه.. اتفضلوا معانا مذاكرة

هل ده حق مكتسب للزوجة فقط، يعنى هى كسبته مع المهر وقت الزواج، وأصبح حكرًا عليها لوحدها. 

تلاقى فى حالة من الهرج والمرج  بتحصل للأمهات وقت الامتحانات ويبقوا محضرين نفسهم أول لما الأولاد يرجعوا من المدرسة علشان يذاكروا، وأول لما الزوج يسمع كلمة إن فى امتحان وحنقعد نذاكر هوووب فص ملح وداب.

يعنى لو كان لسه راجع من الشغل والمفروض إنه خلاص مورهوش حاجة أول لما يلاقى إن المذاكرة حتبدأ يقوم لابس ونازل، أصلى افتكرت إن بنت عمت أمى كانت عوزانى ضرورى فى مشوار مهم جدًا مسألة حياة أو موت، وطبعًا مش ممكن إنى أكون مقصر معاهم. وغريبة إن المشاوير دى بتحصل وقت المذاكرة والامتحانات بس .

طيب حضرتك بالنسبة إن الحرب العالمية احتمال تقوم فى المنزل بسبب الامتحان والمذاكرة وكده.. واحتمال كبير نحتاج لقوات دولية لحفظ المدنيين، وبما إن مفيش حد غيرك فإحنا محتاجينك معانا كأب علشان لو حصل تطاول بالأيدى أو بأى أسلحة تانية تكون موجود علشان تحجز وتنقذ ابنك، وبعدين مش لازم ننسى الأم، دى ساعات بيجيلها حالة من التشنجات وارتفاع فى ضغط الدم مع صعوبة فى التنفس وممكن جلطة عادى، وده طبعًا نتيجة إن الأمور ابنك نسى حاجة الامتحان فى المدرسة أو مكسل يدور على الورق أو بيحاول يشلها يمكن تبطل تذاكر له.. فى أسباب كتيرة.

فوجود حضرتك مهم جدًا للإنقاذ، أو ممكن نحتاجك تذاكر للولد، تشرح له حاجة كفالة الشىء أو  تسمع له الدرس. أى حاجة كده وأنت قاعد، تسلى بيها نفسك،

لكن طبعًا الإجابة هى أنا مش بعرف أشرح ولا أذاكر لحد على أساس إن الأم دى سلاح التلميذ.. وطبعًا الإجابة دى موحدة يعنى فى كل المواد ولكل الأعمار  على أساس إنه معداش على تعليم من أساسه.

حقيقى موضوع المذاكرة للأطفال بيكون حاجة صعبة جدًا على الأمهات، وبتدمر العلاقة بين الأم والولد، وأحيانًا الزوج كمان، فياريت عزيزى الرجل تدخل برجلك اليمين وتتفضل معانا مذاكرة.. 

الولد ده زي ابنك..