رابطة المفنجلين المصريين

فى كتاب باع أكثر من 15 مليون نسخة اسمه (نادى الخامسة صباحًا) لكاتبه الكندى من أصل هندى روبين شارما، يتناول الكتاب نظام صباحى بيساعد الشخص على تعظيم قدراته الإنتاجية، واستند المؤلف فى طرحه لفكرة الكتاب على بعض الدراسات التى قام بها ليكشف إزاى العظماء والرؤساء كانوا بيقضوا روتين صباحهم من الساعة خمسة الصبح.

كل الشخصيات اللى اتكلم عنها روبين شارما اختار أن يصحى الفجر بمحض إرادته.

أنا بقى يا ولداه مش عايزة أصحى خمسة وستة الصبح يوم الجمعة من كل أسبوع.

ومن موقعى هذا بدعو كل المعترضين على الصحيان بدرى يوم الأجازة بتشكيل رابطة لكل الناس المتضررين وصاحيين من النجمة بلا أى سبب أو مبرر ونسميها رابطة المفنجلين المصريين.

سبحان الله يا أخى الإنسان ده كائن غريب وعجيب، أيام الشغل يطلع عينه عشان يصحى فى ميعاده ويلحق يلبس وينزل ويبدأ يومه وتلاقيه يوم الأجازة صاحى زى القرد وبيفرك ويتقلب يمين وشمال من غُلبه وبيتحايل على النوم يكحّل جفونه ومفيش فايدة.

واللى بيتعب أعصابى أكتر من الصحيان بدرى يوم الأجازة هم الناس اللى لما أشتكيلها همّى تقولى: لعلمك يا منى إحنا بنصحى بدرى يوم الجمعة مخصوص علشان ننزل ونركب عَجل - آه والله العظيم حصل.

وهنا أخص بالذكر صديقى طارق اللى فى خضم ما نمر به نحن المفنجلين يوم الجمعة بيصحى بإرادته الحُرة ويركب عَجلته ويهرينا صور وهو لابس الخوذة على الكورنيش فى إسكندرية لما يكون هناك، راعى نفسيتنا يا أخى إحنا أصحابك برضه.

أول مرّة قالى كده قلت بيقلش عليّا بس خيّب ظنّى وطلع بيتكلم جد وابتدى يقنعنى إن فايتنى كتير وازاى أن ركوبة عَجل يوم الجمعة الصبح دى بتضّبط الأسبوع كله لما لها من تأثير نفسى معنوى داخلى وخارجى على المزاج العام وازاى أنه نشاط جامد أوى وله مجموعات وچروپات تلاقيهم على طريق السخنة كل جمعة. أنا مش معترضة يا طارق ومقتنعة إن الناس أذواق فى قصة الصحيان بدرى يوم الجمعة، بس سؤالى ليه يعنى يوم ما نصحى بدرى نروح نركب عَجل؟ أومّال أماكن الفطار الحلوة فى الشمس اتعملت ليه ونروحها إمتى؟ وقهوة الويك إند نشربها إمتى؟ رد عليّا وقالى: بعد ما نركب العَجلة الساعة خمسة الصبح ممكن نعمل الحاجات دى، مناقشتوش وسكت وكتمت فى قلبى.

أنا مش طالبة كتير والله، نفسى أصحى الساعة 8 أو 9 فى الأجازة - مش بعيدة عليك يا رب تنولهالى ولحد ما يحصل بدعو كل المفنجلين المبكرين أننا نعمل group therapy سوا ونوطد علاقتنا ببعض ونتصور الجمعة الصبح فى أماكن الفطار والقهوة، هبدأ بنفسى مع رحاب صاحبتى وزوجة طارق، إحنا جامدين أوى ومش أقل من مجموعات العَجل فى حاجة.