رغم الإعاقة.. محمود خالد: الحياة كلها وردى زى العيد

فى كل مَرّة وفى كل مَقال هنتكلم فيها مع بعض عن لحظة سعادة، ممكن تكون اللحظة دى فيها سعادة لكل إللى حواليك، وتكون لحظة حزن ليك أنت شخصيّا، والعكس كمان ممكن يحصل، تكون لحظة سعادة ليك وتكون لحظة حُزن لكل إللى حواليك.. لحظات سعادة كتير هنتكلم عنها بتحصل لناس كتير، سواء لحظة سعادة بالنصر أو لحظة سعادة بوظيفة كان صعب قوى تتحقق، لحظة سعادة بمنصب مستحيل أو لحظة سعادة للشفاء من مرض صعب جدّا الشفاء منه.

 

فى لحظات بتحس فيها إن الوقت وقف ومبيمشيش، واللحظات دى بتكون لحظات الانتظار ولحظات بيكون الوقت فيها تقيل مش بيمُر لحد ما تطلع حاجة وانت قاعد مكانك تقدر تروح عالم تانى خالص وانت قاعد مبتتحركش الدنيا بتيجى لحد عندك. 

وبدخلك عالم موازى اللى «محمود» لاقَى نفسه فيه..

أقولكم خلينا نسمع من «محمود» بطل مقالة النهارده.. 

محافظة الجيزة «الطالبية هرم».. عندى ضمور عضلات.. خريج كلية الآداب جامعة القاهرة.. عندى أخ واحد «محمد»..

بابا موظف إلكترونيات فى وزارة الداخلية وماما ربة منزل.. روحت فى مَدرسة أيام الابتدائى خاصة بالإعاقات الحركية، وعرفت المَدرسة عن طريق أخويا محمد الأكبر منّى وهو عنده نفس حالتى ضمور عضلات برضه..

الحمد لله مكنش فى تنمُّر معايا أو مع محمد لأننا فى منطقة تقدر تقول عليها إن جيرانها بتحب بعض وتقدر تقول فعلاً الجيران لبعضها..

ومن أهم الصعوبات اللى بتواجهنى فى حياتى هى النزول من أى دور عالى والسلالم عمومًا طبعًا؛ لأن كان بابا بينزلنا المدرسة وبعدين يطلع على شغله ونستنى لمّا يرجع عشان نروَّح.. وكانت ماما بتفضل قاعدة معانا بقى..

ربنا كرمنا الحمد لله بمُدرسين ولاد حلال وبرضه احنا كزمايل كان اللى بيقدر يعمل حاجة للتانى بيعملها وبنساعد بعض فى المدرسة، وكان نفس الوضع فى الثانوى لما تخرّجنا.. بس دى كانت مدرسة عادية لكن كان مدير المدرسة إنسان محترم.. ولما لقى الفصول عالية ومش هنعرف نطلع وفّر لنا فصول تحت..

الصعوبات عامة من زمان ولحد دلوقتى هى النزول؛ لأنى ساكن فى أول بلكونة فبالتالى لازم حد يساعدنى ومع الوقت أنا بكبر وبابا بيكبر وبيبقى صعب عليه يشيلنا وينزلنا.. أنا بقى عايز أشرككم معايا فى الحاجات اللى بحبهما.. من زمان وأنا بحب القصص وكده فكنت بحب اسمع الحكايات لحد 5 ابتدائى، وفى خمسة ابتدائى كتبت أول قصة ليّا «التحدى والإرادة».. والناس فى المدرسة عندى قرأوها وعجبتهم والمكتبة فى المدرسة خدت نسخة حطيتها عندهم وفى طلبة كتير قروها من 5 ابتدائى لـ2011 كنت بكتب على فترات، وفضلت أكتب قصص قصيرة لحد ثورة يناير، وبعدها وقّفت الكتابة شوية وبدأ يبقى عندى انترنت، اتعلمت فوتوشوب من خلاله وبقيت أقرأ كتب pdf وروايات وبقيت متابع للقصص والروايات اللى بحبها وبوصل ليها بدوسة على زرار الكى بورد، ومش بس كده اتعلمت أصلح أعطال الموبايل والكمبيوتر «سوفت وير»، واتعلمت فوتوشوب لأن أنا بحب الصور والألوان، وخيالى لأبعد مدى.. سنة 2016 بقى رجعت تانى للكتابة بس قررت أدمج الفوتوشوب بجانب الكتابة، وفى 2017 كتبت أول رواية pdf ليّا اسمها «الحب عيد والقدر سرطان حميد»، بمعنى احنا لمّا بنحب بنتخيل الحياة كلها وردى زى العيد، ولمّا يحصل لينا موقف وحش من وجهة نظرنا بنقول عالقدر إنه سرطان «لكن بعدها بتكتشف إنه هو أنسب حاجة لينا».

تانى عمل ليّا مجمع كان طاقة نور عن العلاقات وإزّاى نختار شريك الحياة والأسباب اللى بتدمر أى علاقة.. كان كل ده فى حوالى 15 صفحة زى لقاء تليفزيونى. 

بكتب برضه قصص قصيرة وخواطر وبوستات يوميًا تحفيزية للناس لأن أنا نفسى المحتوى الهادف يرحع تانى والناس ترجع تحب القراءة.. وده خلانى أكتب عامّى مش لغة عربية عشان أكبر قدر من الناس يقرأ ويفهم ويستوعب يقرأ ولو قدرت أغير ع الأقل فى شخص واحد يبقى أنا كده كسبت.

وكمان نفسى أسيب أثر ليّا، مبقاش عايش بلا هدف، اللى بتمنى لشغلى إن أقدر أتطور من نفسى أكتر ويبقى مصدر دخل ليّا سواء من الكتابه أو من الفوتوشوب عن طريق إنى أشتغل على صور أى حد عايز يعدل ألوان فى صورة أو أظبط صور كانت مقطوعة وصاحبها عايز يظبطها علشان يحتفظ بيها..ونفسى طبعًا أنجح فى مجال الكتابة واللى بكتبه يشوفه عدد كبير من الناس.. الواحد بيبقى مضايق لمّا يلاقى ناس «بدون أسماء» بتقدم محتوى بلا أى قيمة ومع ذلك ظاهرة ومعروفة، وناس بتقدم حاجة مفيدة وتنفع غيرها ومش بتتشاف.. باختصار أنا نفسى أتشاف وأساهم فى المجتمع بجزء بسيط إنى أغيَّر من البشر وأخليهم يحبوا بعض، والكلام إنى بقدم حاجة ومبتوصلش للناس الكلام مش عليّا أنا بس دى ظاهرة للأسف بقت منتشرة جدًا، وأخيرًا بحب أشكر عيلتى وأصحابى واللى بيتبعونى على الفيس بوك لأن الحياة بيكم طعمها أحلى.

وأنا بقولك يا «محمود» يارب تحقق كل اللى بتتمناه، وبقولك انت وعيلتك نهاركم سعيد ويومكم بيضحك، وبقول لكل اللى يقرا المقالة نهاركم سعيد ويومكم بيضحك.