جوزك على ما تعوديه.. إحنا بنشترى راجل
رغدة أبورجب
دايمًا كنت بسمع الجملة دى من والدتى الله يرحمها وأنا صغيرة؛ بس مكونتش فاهمة أوى معناها، كانت دايمًا تقعد معايا أنا وصحباتى البنات وتقول لينا إن الرجولة أهم من الفلوس، وإن لازم لمّا نرتبط يكون راجل بمعنى الكلمة دون النظر إلى إمكانياته المادية «إحنا بنشترى راجل».
وكنت أنا وصحباتى نقعد نضحك مش فاهمين اللى بتقوله، كنا لسَّه صغيرين، ومرّت الأيام وفهمت كلام والدتى الله يرحمها.
الطلبات اللى بشوفها حاليًا من أهل العروسة للزواج أصبحت صعبة جدًا؛ خصوصًا مع ارتفاع تكاليف الزواج.
رفقًا بالعريس يا جدعان أصلاً قرار الزواج دلوقتى بقى صعب جدًا والراجل بيفكر فيه مليون مرّة قبل ما ياخد الخطوة دى، شبح الالتزامات بيسيطر عليه جدًا وأيضًا الخوف من المسئولية.
نشوف دلوقتى واحد بيتقدم علشان يتجوز تلاقى والد العروسة يقول له يا ابنى إحنا معندناش طلبات نهائى يدوبك الشقة والفَرش والمطبخ والأجهزة الكهربائية والخلاط والغسالة وكله على العريس، وطبعًا فستان الفرح والفرح نفسه على العريس، إحنا طلباتنا بسيطة يا ابنى، إحنا بنشترى راجل لبنتنا.. حضرتك أنت كده بتبيع الراجل مش بتشتريه.
ممكن جدًا نتغاضى عن بعض من الأساسيات علشان المَركب تمشى.. الدنيا مش هتقف لو اتجوزتوا من غير نيش، عادى ممكن نجيبه بعدين مع العلم أنه مالوش أى لازمة وبياخد مكان على الفاضى ممكن تبتدوا بحاجات بسيطة وربنا إن شاء الله حيكرمكوا وتجيبوا اللى نفسكم فيه بس بالراحة.
أهم حاجة التأكد من اختيار شريك الحياة المناسب؛ لأن الرحلة صعبة جدًًا جدًا ومحتاجة شريك مميز علشان تقدروا عليها. أمّا جَو الطلبات التى لا تنتهى.. يبقى هتلاقوا نفسكوا متجوزين بعد المعاش!.
