دورى النقاد.. عبد الله غلوش.. من يستحق لقب «نمبر 1»
فى البداية اسمحولى أن أستخدم العامية المصرية فى كتابة هذا المقال.. ليس لشىء سوى أن الموضوع زاد عن حده وأصبح مستفزًا لدرجة كبيرة، وتقريبًا كل نجوم مسلسلات رمضان شايفين إنهم رقم «1» وكلها أيام وكل فنان سيشحن جمهوره للتصويت فى استفتاءات معظمها مضروبة ومُعدة سلفًا والفائز بها هو من وعد القائمين عليها فى حضور حفل التكريم لا أكثر ولا أقل.
ويبقى السؤال الذى يشغل بال الجميع: ما هو المسلسل الأعلى مشاهدة؟ .. وهل مواقع التواصل الاجتماعى كافية للحكم على نجاح أو فشل مسلسل بعينه؟.. الحقيقة أن مواقع التواصل مؤثرة وأصبحت من الوسائل المهمة لقياس الرأى العام، لكنها فى رأيى حتى الآن هى معيار غير دقيق، لأنها لا تخبرنا سكان حوارى كرداسة ومسطرد بيتفرجوا على إيه؟ ولا الناس فى عزبة الصليبة بيشوفوا مين؟ ولا البنات فى حلايب إيه هى قصة الحب التى استحوذت على اهتمامهم فى دراما هذا العام؟ ولهذا السبب أعيد ما ذكرته قبل رمضان وما أقوله كل عام تقريبًا.. مفيش حاجة اسمها مسلسل مجاش أو محدش شافه، مفيش مسلسل مالوش جمهوره، مفيش مسلسل إلا ما يكون له فئة أو شريحة عمرية أو ثقافية أو اجتماعية عاجبهم.
ثقافة الناس فى المشاهدة مختلفة وغالبًا لا تخضع لجودة العمل.. فى اللى بيجيب قناة ومش بيحول من عليها.. وفى اللى مشترك فى أبليكاشن ومش بيتفرج غير على المسلسلات اللى بيعرضها..وفى اللى مبيحبش يتفرج غير على المسلسلات الكوميدية فقط.. وفى اللى بيثق فى رأى حد ينصحه بـ مسلسل أو اتنين بالكتير يتابعها وخلاص.. وفى اللى يحب يصطاد له مسلسل مليان غلطات عشان يقعد يسف عليه.. وفى اللى بيحب نجم معين فمقرر من البداية أنه مش هايتفرج غير عليه حتى لو مسلسله دون المستوى.
متحكمش على المسلسل بدماغك وبثقافتك وبوجهة نظرك أنت فقط .. لأن المسلسل اللى شايفه مباشر فى غيرك مش هايفهمه غير كده .. واللى شايفه بيدعو للبلطجة فى غيرك شايفه واقعى.. واللى شايفه بيناقش مرض مهم، فى قرى كتير فى مصر النوع ده من الأمراض بالنسبة لهم رفاهية وميصحش أصلا نعتبره مرض.. واللى شايف أن المخرج منجم فيه زوجته على حساب باقى الأبطال، فى غيرك ميعرفش أساسًا مين متجوز مين ولا يعرف أسماء المخرجين ولا بيشغل نفسه بالتفاصيل دى أصلًا.
أكيد فى مسلسلات مستواها أفضل من مسلسلات وأكيد فى مسلسلات متشافة أكتر من مسلسلات وأكيد فى ديفوهات أو أخطاء فى مسلسلات كتير وتحديدًا فى السيناريوهات لكنى أرى أن الموسم الحالى أفضل من المواسم السابقة بمراحل، وإن أهم ميزة فى مسلسلات رمضان الحالى هى التنوع عشان ترضى رغبات أكبر قدر من الناس وكل واحد يلاقى اهتماماته فى مسلسل أو اتنين منهم على الأقل.
بوجه عام شايف أنه مفيش فوارق كبيرة بين المسلسلات وبعضها اللهم إلا 3 أو 4 مسلسلات بالكتير، وإن فى مسلسلات كتير لما يتعاد عرضها هاتنجح أكتر بعيد عن زحمة رمضان، ومتنسوش إنه أصبح عندنا حالة تشبع درامى نوعًا ما بحكم أن طول السنة بنشوف مسلسلات جديدة سواء على التليفزيون أو على المنصات الإلكترونية المختلفة.
الخلاصة أنه طول ما هو مفيش وحدة استطلاع رأى وجهاز قياس نسب مشاهدة معتمد من الدولة، هانفضل كل سنة نسمع كلمة المسلسل الفلانى مجاش أو النجم العلانى محدش سمع عنه، ونشوف كم استطلاعات واستفتاءات وسكرينات شوتس مضروبة على بروفايلات النجوم، كل واحد فيهم بيدّعى فيها إنه رقم «١» والأكثر مشاهدة.
أفضل مسلسل
الاختيار 2
أفضل ممثل
كريم عبدالعزيز
أفضل ممثلة
منى زكى
