جوزك على ما تعوديه.. الفَصَلان مش احتياج
رغدة أبورجب
تختلف احتياجات الرجل عن المرأة، كل واحد بيكون له طريقة مختلفة بيعبر بيها عن ضيقه أو عن سعادته. ساعات الرجل بيهرب من همومه بأنه يقعد مع أصحابه على القهوة، ولأنه بيكون محتاج أنه يفصل علشان يقدر يكمل، ده مش معناه أنه بيتنصل من مسئولياته أو أنه بيهرب منها. نهائى الفكرة أنه كل واحد بياخد احتياجاته بشكل مختلف علشان يقدر يكمل. اللى ممكن ياخدها من خروجة أو سفرية أو حتى أنه ينزل لوحده الشارع. بس بيكون محتاجها جدا.
أما الستات ففى جزء كبير منهن بيعتمد على الرجال فى سد احتياجهاتهن، بتحس أن الرجل جزء أساسى معاها فى حل المشكلة وأنها بتعتمد عليه بشكل كبير، فاختفاؤه أو عدم وجوده بالنسبة لها بيكون إهمال أو عدم شعور بالمسئولية، مش بتقدر تتفهم أنه ساعات كتيرة بيكون محتاج أنه يفصل علشان يقدر يكمل مع أن الستات بتحب تفصل بردو، فى ستات بتغير المود بالشوبينج، وفى اللى بتحب تلف فى الشارع وتسمع مزيكا وفى اللى بتحب تخرج مع أصحابها علشان تفك وترجع تانى تواجه الحياة.
تعددت الطرق والفصل شرط مهم لاستكمال الحياة والعودة للضغوط مرة تانية.
اتعلموا تفصلوا وتنفصلوا وقت المشاكل بهدوء لأن ده هيخلى الرجوع أسهل تانى. والفصلان ده مش موضوع أو حوار كل واحد من حقه يفصل شوية ويرجع تانى، أنا هنا بتكلم عن الفصلان فى خروجة أو يوم مش فصلان انفصال، بلاش تلاكيك.
