جوزك على ما تعوديه.. بلاش تبريرات واهية

المشكلة الحقيقية اللى بنقع فيها إننا لما بنحب حد مش بنشوف عيوبه ونبتدى نبرر له كل تصرفاته ومن هنا بتبدأ المشكلة وغالبا ما بتكون التبريرات دى فى أول العلاقة وبيقع فيها البنات أكتر. وبتبتدى تدافع عنه بالرغم من أن العيوب بتكون ‏واضحة للجميع والموضوع بيكون واضح وضوح الشمس. ‏

بس زى ما بيقولوا مراية الحب عامية، بس المشكلة أنها مش بتفضل عامية كتير وبتوضح كل العيوب بعد الجواز، العيوب اللى ‏مصر كلها بتكون أجمعت عليها من سنين لمن هى لسه مكتشفاها وده علشان مش بتسمع ودايما بتدور على مبررات تدافع بيها ‏عن التصرفات اللى ممكن تكون مش عجباها ‏مهم جدا فى الاختيار أن يكون فى موضعية فى الحكم على الشخص، وسماع آراء المحيطين سواء كانوا أصحاب أو قرايب لأن ‏فى عيوب مش بتكون واضحة للشريك نتيجة أنه بيحبه ومش قادر يحكم بموضوعية.

وفى الآخر لازم نعرف أن كلنا عندنا عيوب لأننا فى الآخر بنى آدمين، بس الفكرة أن العيوب دى تتماشى مع شريكى فى الحياة ‏متكونش عيوب صعب عليه تحملها، ونبقى داخلين العلاقة متفاهمين ومتعايشين مع عيوب بعض، لأن زى ما اتفقنا مفيش حد ‏بيتغير هى الفكرة أنه ممكن يحاول يبطل يعمل تصرفات معينة بتضايق شريك حياته لكن تغير كامل ده مش موجود خالص. ‏

فيا ريت براحة كده واحنا بنختار ونركز فى الاختيار قبل ما الورقة تتسحب ونكون جاوبنا غلط.