جوزك على ما تعوديه.. إحنا كمان بنعرف نسوق على فكرة!!
رغدة أبورجب
ليه بتخافوا إننا كستات نسوق؟ على فكرة ممكن تكتيكيا تكون سواقتكم أحسن، لكن عمليا أثبتت أغلب الدراسات إننا فى السواقة أكثر عمليا.
لأنك ببساطة بتوصل فى معادك بغض النظر عن المطبات والحفر وما إلى ذلك من حاجات بتستوقفكم كتير كرجالة.
تلاقى أغلب الرجالة بيقفوا عند المطبات وناقص يقف خالص وينزل من العربية كل ده علشان مطب طبعا إحنا كستات المطبات دى بالنسبة لينا ولا تمثل أى حاجة خالص، نفس السرعة، نفس الثقة بالنفس هوب تلاقى العربية طايرة فى الهوا وعادى إحنا مكلمين.
طبعا موضوع الحزام ده بيبقى اختيارى بالنسبة لينا، وكذلك الإشارات دى بتبقى للمبتدئين مش للعظماء أمثالنا.
الفكرة إننا بنتوتر جدا لما بتكونوا قاعدين جنبنا فى العربية وإحنا سايقين لأن كمية الملاحظات المهمة وغير المهمة كتيرة جدا، مع العلم أن أغلب الوقت الست هى اللى بتسوق وبتعمل المشاوير وبتوصل الولاد، فهى مش أول مرة تسوق ولا مستنية نصايحك العظيمة فى فنون القيادة.
طبعا ربنا ساترها معاها بس فى الآخر هى بتعرف تتصرف وبتسوق وبتمشى الدنيا، فياريت لما تشاء الأقدار وتقعد جنبها وهى سايقة فى العربية بلاش بقى الملاحظات والتوتر الرهيب اللى بتكون ناشره فى العربية.>
