قالت إن سر التميز هو وجود مدير كان زميلًا سابقًا يعرف جيدًا شخصية كل فرد فى المنظومة إيمان مختار: «الراديو 9090» يدعم الإبداع و«كله بالأغنية يفك» مغامرة خارج «ثوبى» الاجتماعى
إبراهيم محمود
بجدارة، حصل «الراديو 9090» على جائزة أفضل محطة إذاعية فى مصر لعام 2024، وذلك فى استفتاء مجلة «ديرجيست»، وهو أمر أصبح متكررًا فى الأعوام الأخيرة، وأعرب الإعلامى عبد الفتاح مصطفى، الرئيس التنفيذى للراديو 9090، عن سعادته بهذا الإنجاز، مؤكدا أنه ثمرة جهود فريق العمل المتفانى فى الراديو. وللاقتراب أكثر من هذا الإنجاز ولمعرفة أبطاله أجرت «روزاليوسف» سلسلة حوارات مع أبرز مذيعى الراديو 9090 لنعرف منهم أكثر عن طبيعة العمل فيه وخطة نجاحه وما يجعله مميزا وسط المحطات الإذاعية الأخرى المنافسة.. وفى هذا الحوار التقينا مع الإذاعية والإعلامية البارزة إيمان مختار، إحدى بطلات النجاح فى الراديو 9090 لتحدثنا أكثر عن كيفية بداية طريقها نحو التقديم الإذاعى، وكيف نجحت فيه وتركت بصمتها، وما سر نجاح الراديو 9090 من وجهة نظرها.. وإلى نص الحوار:
إزاى بدأ عندك حلم إنك تبقى مذيعة راديو ووصلتيله إزاى؟
أنا بدأت فى إذاعة نجوم إف إم «100.6» ودى كانت بدايتى الحقيقية وكانت أول قناة خاصة مكنش فيه قنوات خاصة غيرها ساعتها، وروحت بترشيح من الأستاذ عمرو أديب سمع صوتى وأنا قاعدة جنبه فى مكان ما وصوتى لفت انتباهه وقالى صوتك حلو فقولتله وأنا نفسى أشتغل إذاعة، وبعتنى لأستاذ طارق أبو السعود كان مدير محطة نجوم إف إم، واتقبلت معاهم وعملت أكبر برنامج إذاعى فى مصر والوطن العربى ساعتها كان 5 ساعات هوا يوميا واسمه «أحلى الأوقات مع اتصالات مع إيمان مختار»، وكان بيطلع كل يوم من الساعة 1 بعد منتصف الليل لحد 6 صباحا، وكنت أنا الإعداد والإخراج كمان، وكان أكبر تحدى لنفسى وأنا كنت مذيعة تليفزيون قبلها فى «ART» هو إزاى أبقى مذيعة راديو شاطرة زى ما كنت فى التليفزيون، ودى كانت أول انطلاقة وكانت انطلاقة مرعبة بالنسبالى، وأستاذ عمرو أديب ساعتها قالى إن معظم مذيعى المحطة كانوا رافضين البرنامج ده لأن المذيع بتاعه بيبات جوه الراديو ومحدش أصلا قبله كان بيطلع هوا أكثر من ساعتين ورا بعض، وعلى قد ما البرنامج كان حلو فى نجاحه إلا إنه سببلى فشل فى علاقتى الزوجية انتهت بالطلاق لأن مواعيده كانت بتخلينى أبات كل يوم بره لحد الساعة 7 صباحا مثلا.
فكرة برنامج «كله بالأغنية يفك» بدأت إزاى؟
أنا عملت كل أنواع البرامج الاجتماعية، وأنا معروفة بالبرامج الاجتماعية، حتى فى التليفزيون المصرى أنا بعمل برنامج يعتبر من أكبر البرامج الاجتماعية اسمه «يُحكى أن» على شاشة القناة الأولى، ودايما بتكلم عن مشاكل الستات والرجالة ومين ظالم ومين مظلوم وإزاى نفهم بعض وإزاى نعيش حياة سعيدة، وده اللى كان مستمعين الراديو متعودين عليه منى وبيحسوا إن أنا اختهم الحنينة اللى بتطبطب عليهم وأنا عندى قدرة على الاستماع والتأثر عشان ببقى عِشت وحسيت اللى هم بيحكوه، سواء أم وضحت أو زوجة وانفصلت، وعشت كمان إحساس الست اللى بـ100 راجل وإزاى بشتغل وأقف على رجلى وأتحدى المجتمع وأتحدى نفسى عشان أنجح، وناجحة الحمد لله فى الحتة الاجتماعية دى وبعرف إزاى أطيب خاطر اللى بيحكيلى مشكلته وأحلهاله، وبقالى سنين كثير بقى بعمل برامج اجتماعية على الراديو 9090، منها برنامج «كل يوم تلات» كان بيتذاع منتصف الليل وكنت أنا بمثابة أسامة منير بس النسخة السِت على الراديو 9090، وبعديها عملنا «لسه لينا كلام» وبعديها بقى عملنا السنادى «كله بالأغنية يفك» عشان نخرج برة فكرة المشاكل بقى ونعمل حاجة جديدة، ودى كانت فكرة الأستاذ عبد الفتاح مصطفى.
فى أول السنة جه الأستاذ عبد الفتاح مصطفى وهو كان بيعمل برنامج «دقى يا مزيكا» وكان البرنامج الشعبى الرئيسى فى المحطة وقالى أنا عايزِك تعملى البرنامج ده مكانى وأنا استغربت فى الأول وقولتله أنا بعمل برنامج ثقيل على القناة الأولى ورسمى قوى فالناس هيحصلها انفصام، بس هو قالى لأ انتى كاريزما جدا وعندك إيفيهات وطريقة فى الكلام وبتعرفى تهزرى وتغيرى موود الناس ودى الحمد لله ملكة من عند ربنا إنى حتى لو كنت حزينة بعرف أهزر وأخلى الناس مبسوطة، وهو قالى إنتى اللى هتغيرى موود مستمعى الراديو 9090، ووافقت فعلا وكنت خايفة وقلقانة فى الأول، بس الحمد لله يمكن الناس مكنتش متقبلانى فى الأول بس بعد كده بقوا مدمنين حلقات «كله بالأغنية يفك»، وحققت نجاح كبير حتى الناس مكنتش مصدقاه.
إيه اللى مميز فى الراديو 9090 بيخليه يكسب الجوائز؟ وإيه الإضافة اللى أضافها أستاذ عبد الفتاح مصطفى للراديو بعد ما مسكه؟
المميز فى الراديو 9090 هو الإدارة، الأستاذ عبد الفتاح مصطفى كان زميلنا قبل ما يبقى مديرنا، فلما يبقى مذيع زميل هو المدير بيبقى قعد معانا وعرف مشاكلنا وشاف الحلو والمر معانا وكنا بنحكى معاه كلنا قبل ما يبقى مدير فهو عارف كل واحد فينا إيه الحلو اللى فيه وإيه الوحش ودارس شخصية كل واحد، فلما بقى مدير بقى أشطر مدير ممكن يوظف كل واحد فى حتته، فحقيقى يعنى إدارة مميزة جدا، وعبد الفتاح حد شاطر وفاهم وتحسه أخ كبير وأب وزميل وبابه مفتوح للكل فى أى وقت، ودى حاجة مديانا الأمان والأريحية عشان لو حصلت أى مشكلة بنعرف نبلغه فى أى وقت وفى إدارة بتحتضنك وبتعرف كمان تقول أفكارك براحتك فده بيخليك مبدع.
إيه أكثر موقف كان حلو حصلك فى الراديو وإيه فى المقابل أكثر موقف صعب عدى عليك؟
بالنسبة لأكثر موقف حلو حصلى، فحياتى فى الراديو 9090 كلها مواقف، ويمكن أكثر مواقف حلوة دايما وإحنا بنتكرم وبنقول إحنا الراديو 9090، ويمكن أحلى برنامج اشتغلته وساب علامة فيا كان برنامج مع زميلى حسام عصام اسمه «مفيش نوم» وقبله برنامج كان اسمه «من 6 الصبح» مع حسام عصام برضه، وهو من الناس اللى كانت شغالة ليا زى الدكتور النفسى ولينا إيفيهات طول الوقت بفتكرها، وهو من الزملاء اللى ليه بصمة فى قلبى عشان كنا بنقعد قبل الحلقة يكلمنى ويطبطب عليا زى ما أنا بعمل بقى مع الناس، وكان الشغل معاه بيغير مودى فعلا.
أما أصعب موقف فيمكن مفيش مواقف صعبة عشان كلنا بجد بنتكاتف مع بعض فى الراديو 9090 وده بيخلى أى موقف صعب يعدى فعلا.
إيه برنامج الراديو اللى كنتى بتسمعيه وأنت صغيرة وأثر عليك؟
برنامج الراديو اللى كنت بسمعه وأثر فيا هو برنامج «اعترافات ليلية» للإعلامية القديرة جدا بثينة كامل اللى كانت والدتى الله يرحمها بتسمعه وأنا كنت صغيرة وببقى قاعدة جنبها بالليل وأنام على رجليها وأسمعه معاها، وكان الراديو سحر بالنسبالى عشان كان الحاجة الوحيدة اللى بشوفها بتبسط والدتى، والبرنامج ده شكل جزء كبير من وجدانى وخلانى أحب أسمع المشاكل وأحب أحل مشاكل الناس وأنفعل معاهم وأحس بيهم وأطبطب عليهم، وهو أثر عليا بشكل كبير لدرجة إن برامجى كلها بقت اجتماعية وكلها اعترافات، وكان نفسى أعمل ده فى برنامج تليفزيون على التليفزيون المصرى زى برنامج «حياتى» اللى أنا اتأثرت بيه برضه.
بمناسبة الأغانى، إيه الأغنية اللى ممكن تشغليها وتسمعيها طول اليوم ومتزهقيش منها؟ ولو فى أغانى بتمثل محطات فارقة فى حياتك أو أغانى مرتبطة معاكى بمواقف معينة؟
الأغنية اللى ممكن أشغلها طول اليوم ومزهقش منها هى مش أغنية واحدة لكن أى أغنية حلوة، يعنى ممكن تكون فى أغنية ترند ومسمعة اليومين دول والتيمة بتاعتها تعلق فى ودانى فتلاقينى طول الأسبوع أو الشهر بسمعها، أما الأغانى اللى مرتبطة معايا بمواقف معينة، فمثلا فى أغنية لبهاء سلطان اسمها «إحلف» مرتبطة معايا بموقف إن جوزى السابق أبو أولادى «اللواء محمد السيد» كان بيغنيهالى فى فرحنا وأنا حبيت الأغنية من طريقة غناه ليها، وفى أغنية تانية «دويتو» غنيناها مع بعض فى فرحنا اسمها «بتحبنى» لحميد الشاعرى وقعدت أحفظهاله قبل الفرح بأسبوع، وطبعا أغنية «يا بنات يا بنات» لنانسى عجرم عشان أنا عندى 3 بنات (حبيبة وفريدة وكريمة)، وأول ما الأغنية دى نزلت كنت بغنيهالهم ونرقص عليها.
