جوزك على ما تعوديه.. على فكرة خليها واقفة.. مش لازم تمشى
رغدة أبورجب
تحت شعار «علشان المركب تمشى» كله بيحاول يعدى حاجات ويتغاضى عن حاجات فى سبيل أن الجوازة تستمر.
ده شعار لطيف جدا بس مش مريح بالمرة وينفع فى حاجات ومينفعش فى حاجات.
يعنى المشاكل البسيطة اللى ممكن تتعدى نتيجة اختلافاتنا آه طبعا لازم نكبر دماغنا علشان المركب تمشى.
لكن تجاوزات وإهانات ومواقف كبيرة ممكن تصل إلى تدخل الأهل فى الخناقات يبقى لازم هنا نقف ونفكر نشوف الموضوع مستاهل ولا لا؟
العلاقة من أساسها تستاهل أن الواحد يضحى علشانها ولا لأ؟، الشخص نفسه كويس وده مجرد موقف أو نزوة ولا ده أسلوب حياة.
كل واحد بيكون عنده أولويات ومواقف معينة ممكن يتقبلها عن غيره بس دايما فى خطوط كلنا مش بنحب حد يتجاوزاها معانا.
فمش دايما لازم نضحى علشان المركب تمشى، ساعات بنكون بنضحى بنفسنا إحنا وبنرميها فى التهلكة علشان علاقة محكوم عليها بالفشل.
أصل الجوازة التوكسيك دى بتجيب لصاحبها الكافية وممكن تقضى عليه.
فيا نختار كويس ونعيش تمام يا بلاها الجواز من أساسه وخلينا طلقاء وخلى المركب واقفة.
