الشيخ حسنى
منى رضوان
الشيخ حسنى هو شيخ ضرير مبيشوفش بس عنده بصيرة، عايش فى إمبابة أو تحديدًا فى حى الكيت كات.
الشيخ حسنى هو أحد أهم شخصيات رواية مالك الحزين للكاتب المعاصر إبراهيم أصلان الليّ يعتبر من أشهر الأدباء العرب على الإطلاق.
تحولت الرواية لفيلم لعب فيه محمود عبدالعزيز دور الشيخ حسنى وكان من إخراج داوود عبدالسيد ويعتبر الفيلم ده من علامات السينما المصرية وبيحتل رقم 24 من أفضل قائمة أفضل 100 فيلم فى تاريخ السينما المصرية.
البطل الحقيقى فى الفيلم والرواية هو الحى، حى الكيت كات الليّ بنشوف فيه مثال واضح من الطبقة الشعبية فى مصر بكل ما تعيشه من علاقات وظروف وصعوبات، بس أكتر حاجة استوقفتنى هى علاقة الشيخ حسنى بأبنه يوسف.
علاقة فيها تقرب من الأب لابنه وفيها دروس مستفادة بيوصلها الأب لابنه الوحيد يوسف.
يوسف فى أحداث الفيلم كان محبط علشان اتخرج وقاعد عاطل فقرر يسافر، فى مشهد الشيخ حسنى بيقوله: يوسف، عارف وإنت صغير، كنت لما بتمشى بتدب على الأرض، دلوقتى إنت مش عاوز تلمس الأرض، عاوز تطير، عرفتك من خطاويك.
وهنا بنشوف إحساس الأب بابنه ووصفه لحالته بالضبط.
وفى مشهد تانى عالمى بينصح فيه الشيخ حسنى أبنه وهو متضرر من فقره، وبيقوله:
- طيب إيه أحسن من الفلوس؟ تقدر تفهمنى يابا؟
- أحسن حاجة فى الدنيا الناس الطيبين يا يوسف، وعشان كده لما هيخلصوا هتخلص الدنيا.
- طيب والطيبين دول هيعوضونى عن الفلوس ولا هاآكل وأشرب وأتجوز بيهم؟
- اللىَ بيأكلك ويشربك ويجوزك هو رب الناس الطيبين، خلى بالك من الطيبين ومتجيش عليهم ولا تمشى فى ديل اللى ييجى عليهم، هاتلاقى ربنا معاك ويكرمك.
- الطيبين اللى اعرفهم كلهم غلابة والمريسة مع الأندال وخدامينهم، عايزنى أبقى فى كفة الغلابة؟
- يا بنى الدنيا بتتشقلب فى يوم وليلة والغلبان بيقوى والقوى بيهده اللى أقوى منه واللىّ فوق يقع على جدور رقبته واللىّ تحت يبقى فوق، ما يغركش البهرجة اللىَ حواليك، دى نفخة واحدة من السما تعدل المقلوب وتقلب المعدول.. فوق يا يوسف.
الشيخ حسنى كان فاقد للبصر، ولكنه كان بيشوف كويس بقلبه وإحساسه، خصوصًا رؤيته ليوسف ولشخصيته ونفسيته.
علاقة الشيخ حسنى بتثبت لنا شيء واحد هو أن علاقة الأبوة فيها رباط وثيق بين شخصين أو روحين أن صح التعبير.
بس عادة إحساس الأب بالأبن أكثر من إحساس الأبن بالأب، بنشوفه بيفرح لفرحه وبيحسّ بيمر بأيه.
الشيخ حسنى أب متميز، مش بس علشان شايف من غير ما يشوف هو أكتر حاجة مميزة فيه هو أنه أب عنده القدرة والشجاعة أنه يبرز مشاعره مع أبنه وبيعرف يتكلم معاه، بيسمعه علشان يفهمه مش علشان ينظّر عليه، العلاقة دى فى أبهات بيشوفوا مبيعرفوش يعملوها.
