جوزك على ما تعوديه.. شفتى طلباته سهلة إزاى!؟
رغدة أبورجب
كلها طلبات سهلة وبسيطة ومحلولة بإذن الله.
الأول كده القميص الأبيض يروح الغسيل ويرجع بالسلامة بنفس لونه، الشربات تدخل وتطلع من الغسالة مع بعض بنفس لونهم،، تحس إنها قدمت على هجرة ومش راجعه تانى.
بيحب الأكل والأنتخة، فا بيكون عاوز يأكل أكل بيجيه وينام محدش يصحيه، وطبعًا يروح القهوة مع أصحابه كل يوم زى قبل الجواز بالظبط. ده عربون المحبة زى ما بيقولوا.
طلباته الحقيقية أبسط من كده بكتير مش عاوز حد يكلمه أغلب اليوم، عاوز يتفرج على الماتشات بجميع أنواعها وجميع فرقها.
بيحب الريموت أوى أوى، بيحب يتفرج على الموبايل وهو ماسك الريموت فى نفس الوقت متسأليش إزاى.
بيحب يقعد فى الحمام كتير، بيحب يبقى أهم حاجة فى الدنيا، وبيحب أصحابه جدًا جدًا.
متحوليش تقولى له إن أكلك حلو أو ممكن يكون شبه أكل أمه، لأن دى خناقة قديمة أوى وحافظنها كلنا فا روحوا كلوا كلكم عند مامته واهو تبقى موقفتيش فى المطبخ.
بيحبك بس بيحب البلاى ستيشن أكتر فا يا ريت متكلميهوش وقت الماتش، مش بيحب التليفونات الكتيرة خالص ولا واتس آب كتير لأنه بيشوفه نوع من الزن.
متكلميهوش وهو مع أصحابه حتى ولو عاوزه تطمنى عليه، لأنه ببساطة مش حيرد أو لو رد حيبقى غلس أوى.
سبيه لوحده لما يبقى مش عاوز يتكلم غالبا بيبقى تعبان ومش قادر يخش فى مواضيع معاكى بس لو أصحابه عادى طبعًا.
وربنا معاكى يا بنتى، كلنا لها، شكة دبوس.
