جوزك على ما تعوديه.. عاوزة أكلمك فى موضوع
رغدة أبورجب
ده كمين ممكن يؤدى بيك إلى التهلكة، وأنا طبعا علشان خايفة عليك وعلى الكيان الأسرى لازم أوضح لك أن الجملة دى خطر وفى خطوات لازم تعملها أول لما تسمعها.
يعنى لو بتتفرج على التليفزيون تطفيه لو بتلعب فى الموبايل تسيبه، لأنها بتكون محتاجاك تسمعها وتركز معاها.
طبعًا إنت بتهز رأسك مع أول جملة فى الحوار، وده بيكون نابع من لا شىء مش اقتناع لا سمح الله، وبعدها بشوية بيصاحبها كلمة معلش.
وأنا هنا أحب أقترح أننا ممكن نستبدل هز الرأس بأى حاسة أخرى توضح لها أنك بتشاركها الحوار مش مجرد بتهز رأسك والسلام.
أما معلش فأنا شايفة إننا ممكن نستبدلها بمعاكى حق، دى حاجة سخيفة أوى، فعلاً موقف وحش، تصرفك كان ملائمًا جدًا للموقف، أنا حتصرف فى الموضوع ده.
يعنى جمل بسيطة ممكن تسيطر على الموضوع، لكن كلمة معلش دى بتحسسها إنك بتاخدها على قد عقلها.
طبعا مش محتاجة أشرح لك إنها لو بتعيط لازم تصعب عليك، وتقدر دموعها لأنها فعلاً بتكون متوترة وزعلانة.
وطبعًا حتسمعها بشغف حتى لو بتعيد الكلام أكتر من مرة، ما هو التركيز مش حيظهر دلوقتى، ما انت بقالك ساعة بتهز فى دماغك.
لو اتّبعت الخطوات دى ممكن أضمن لك بنسبة 50 ٪ إنها مش حتقلب عليك الموضوع وتبقى أنت أصلاً اللى مضايقها وسبب زعلها.
كله بالبساطة بيمشى، وإياك تقفش على ست وهى زعلانة لأنها ببساطة قادرة على قلب الطرابيزة بأكملها عليك.
