جوزك على ما تعوديه.. الفطار مايحلاش إلا كده

بريك الشغل ده بيجى على الزوجة بخسارة، كل يوم البريك بيبقى مع حد سواء ست أو راجل، إنتى وحظك وكله علشان الشغل مش عشانه لا تكونى فاهمة غلط، مصلحة الشغل فوق كل حاجة.

طيب بما أن فى بريك ليه مايبقاش أوبشن لطيف ينزلوا يشربوا فيه قهوة مع بعض ولا القهوة متحلاش إلا مع أصحاب الشغل بتبقى مرة مع الزوجة. 

ناهيك بقى عن الفرفشة والانتعاش اللى بيكون فيها مع أصحاب الشغل، تلاقى صوت الضحك خارج من التليفون وبيخرم ودنك، طب بالنسبة للبوز اللى بنتكعبل فيه فى البيت وإحنا ماشين ده نظامه إيه؟ 

وما شاء الله الحوارات اللى بتتفتح فى الخروجات بتبقى مثمرة، والمواضيع كتيرة، طب بالنسبة للحوارات اللى بتحاول المسكينة تفتحها معاك فى البيت ومش بترد عليها أصلا. وبتكون مواضيع جذابة على فكرة، لكن مفيش إشارة عندك خالص الشبكة بتكون واقعة. 

كل حاجة بتكون ظريفة ولطيفة بره البيت تمام، بس على الهادى يا زبادى وخبط بالعقل مفيش داعى تفتح أبواب جهنم عليك.