جوزك على ما تعوديه.. عاوزين صيانة للعلاقة

حتى لو العلاقة قوية ومستقرة بتحتاج لصيانة وده علشان تستحمل مطبات الحياة اللى كلنا بنمر بيها نتيجة الضغوط اللى بنتعرض ليها. الصيانة هنا بتتعدد أشكالها، ممكن تبقى صيانة معنوية أو صيانة مادية

المعنوية ممكن تبقى بكلمة حلوة من الزوج لزوجته والعكس أو حركة لطيفة تحسس الشخص الآخر بتقدير حتى ولو نظرة بسيطة. أما الصيانة المادية دى بتكون للطرفين، يسافروا مع بعض يوم أو يومين يبعدوا فيها عن الالتزامات وضغوط الأولاد ومصاريفهم، باختصار يشيلوا التراب من على علاقتهم، ده بيساعد كتير فى نجاح العلاقات. 

الاستمرارية على نفس الوتيرة دى بتكون صعبة وبتحتاج مجهود جبار لاستقرار العلاقة.

التفكير فى العلاقة الزوجية بيبقى ساعات مش موجود نتيجة كتر الحاجات اللى الواحد مفروض يعملها فا بتقل أهمية الصيانة وتندرج فى أسفل قائمة الأولويات، مع أن أهميتها فى أول القائمة لأنها بتصون العلاقة من الانهيار  الكلمات الحلوة ليها سحر جامد فى إنعاش العلاقات.

حبوا بعض وفكروا فى موضوع الصيانة لأنه مهم وبيساعد فى إنجاح العلاقات الزوجية.