جوزك على ما تعوديه.. متقوليش معلش
رغدة أبورجب
حتقول لى أمال أقول لك إيه؟
متقولش حاجة خالص، اسمع وأنت ساكت
ما هو مش طبيعى إنى أحكى لك على مشاكلى وأنا منهارة من العياط وكلى غضب علشان تقول لى معلش
ولا اللى أتكسر يتصلح أو أى نوع من أنواع الكلام اللطيف ده.
ومش شرط نهائى إن المشكلة تكون قوية بالنسبه لك زى ما أنا شيفاها، الموضوع ده نسبى ومتفاوت تماما بين المرأة والرجل.
أصل غالبا أنتم كرجال بتشوفوا أغلب مشاكلنا هايفة، وده ساعات بيكون حقيقى فعلا، بس ده مش معناه إنك متسمعنيش، أو تتجاهل مشاعرى بكلمة معلش اللى بتطلع بهدووووء شديد دى تفاديا للمشاكل والخناقات. المرأة بتكون محتاجة إنك تسمعها بس.. مع التخلى عن صفاتك الذكورية اللى هى تحليل الموقف والبدء فى إعطاء حلول للمشكلة والكلام الكبير ده لأنى ببساطة مش عاوزة حلول أنا عاوزاك تسمعنى وبالكتير تطبطب عليا مش أكتر من كده أنا كمرأة بكون عاوزة أحكى وأطلع اللى جوايا وأعيط بلا أى هدف، واحتمال المشكلة كمان تكون هايفة.
فا أرجوك طبطب ودلع وانزل معايا إلى مستوى مشاكلى، وبلاش معلش اللى بتكون طالعة من معاميعك دى علشان فى الحالات دى الستات بتكون متهورة جدا وممكن ساعتها هى اللى تقول لك معلش على كم الإصابات اللى ممكن تحصلك.
نسيت أقول لك إن من ضمن المشاكل اللى حتحكيها لك إنها عاوزة تقص شعرها بس خايفة يبقى وحش وكمان صعبان عليها شعرها، شفت المشاكل؟
