جوزك على ما تعوديه.. شكراً زوجى العزيز

علشان نكون على حق لازم نفهم أن الطرفين فى علاقة الزواج بيكونوا تَعبانين ومضغوطين، ودِه لعِدة أسباب؛ سواء اقتصادية أو نفسية نتيجة تحمُّل المسئولية، أو اجتماعية نتيجة الضغوط اللى بتكون من الأهل.

إذن؛ لكى نتفق لازم نفهم إن الجواز مش سهل وإن تكوين أسرة دى حاجة صعبة. 

فا زَى ما احنا بنطلب الدعم وبنطلب الرومانسية وبنطلب الاهتمام لازم نديهم هُمَّا كمان، هُمَّا مش مَكن، دول بنى آدمين بيحبوا يسمعوا كلمة حلوة ويسمعوا كلمات الشكر والتقدير على مجهودهم حتى ولو كان بسيط.

لازم نشكرهم من حين لآخر.

تعالوا نتلكّك على شكرهم، أى موقف بسيط أى خروجة لطيفة نقول لهم كلمتين حلوين فعلاً حيفرقوا، وكمان ممكن يتشجعوا على المزيد.

تعالوا نجرّب مش حنخسر حاجة.

بجد للكلمة الحلوة تأثيرها السحرى على أى بنى آدم حتى لو مش رومانسى. 

التقدير حيحسّسه إننا معاه وشايفين مجهوده وإننا لو اتلهينا ده مش متعمّد دى الحياة اللى بتاخد كل واحد بعيد عن التانى.

لكن الحقيقة إننا المفروض نكون فى ضهر بعض ونشيل بعض علشان نعدّى بالعلاقة لبَرّ الأمان بأقل الخساير.

تعالوا نبتدى ونجرّب.. شكرًا زوجى العزيز على مجهودك الجبار، (ربنا يسامحنا إن شاء الله) فى حياتنا، وفى انتظار المزيد.