جوزك على ما تعوديه.. موجة حارة جدًا

الجو الجميل والبديع اللى إحنا فيه ده بيخلى الواحد خلقه ديق وقدرة احتماله لأى ضغط تقريبًا صفر، وأى خناقة مهما كانت بسيطة فهى معرضة أن تصبح قضية رأى عام، لذا نهيب على السادة المتزوجين تخفيف الأحمال وترشيد الاستهلاك على غرار وزارة الكهرباء.

ودى بعض الإرشادات اللى ممكن تساعد فى تجاوز هذه الفترة الحرجة، من أهمها ضرورة الابتعاد عن أى مؤثرات أو منغصات حتى ولو بسيطة. الكلام يتقال مرة واحدة بس، دخول المطبخ بمواعيد محددة وعلى من يرغب فى المزيد اللجوء إلى خدمة نفسه (help your self) 

بالنسبة بقى لفكرة توفير الكهرباء علشان الفاتورة وغلاء الأسعار والكلام الكبير أوى ده اللى اتكلمنا فيه قبل كده بخصوص مساندة الزوج فى التوفير، انسوه أيوه انسوه مفيش الكلام ده خلص، الكلام فى توفير حاليًا ممكن يؤدى إلى الطلاق فى مثل هذه الظروف، فعليك أن تختار ما بين الاستقرار الزوجى والعائلى أو فاتورة الكهرباء.

أما بالنسبة للتمارين اللى بتكون فى منتصف النهار ده وقت ما بتكون الشمس مباشرة على المخ، دى خلاص ننساها زى ما بننسى المذاكرة.

المروحة أو التكييف لا يقلوا أهمية عن الثلاجة فى أى منزل، ووداعا لفاتورة الكهرباء. 

وفى حالات قطع الكهرباء اللى أصبحت متكررة حسب بيان الوزارة يجب على أفراد الأسرة الامتناع عن الكلام لأن أى كلام فى الفترة دى ممكن يؤدى إلى محكمة الأسرة، لأن الواحد مع الحر بيبقى فاقد للوعى وممكن يقول كلام يحاسب عليه قانونا أو يعترف بأى اعتراف ممكن يؤدى إلى ما لا يحمد عقباه.

اختصارًا يا جماعة ابعدوا عن بعض فى هذه الموجة الحارة تجنبا للمشاكل وربنا ينولنا الشتاء ونوصل بالسلامة بدون أى خسائر فى الأرواح وربنا يكملها على خير ويستر على شهر أغسطس.