جوزك على ما تعوديه.. عيد ميلاد جوزى
رغدة أبورجب
طبعًا كل واحدة بتحاول تسعد جوزها بالشكل اللى تقدر عليه، لكن فى عيد ميلاده بتحاول تعمل مجهود أكبر علشان تحتفل بالذكرى اللذيذة دى.
طبعًا الموضوع من وجهة نظرها بيبقى موضوع مهم جدًا، وبتحاول تعمل فكرة مختلفة علشان ينبسط. تلاقيها تتفق مع أصحابه علشان تعمل احتفال بدون عِلْمه، واللى غالبًا بتفشل وتلاقى حد من أصحابه مثلاً بيكلمه يسأله إحنا حنتقابل إمتى، ولّا ممكن تبعت لى اللوكيشن علشان متهوش.
فكرة إننا نهتم ونعمل احتفال حتى ولو بسيط بتكون حاجة ممتعة جدًا للزوج وبيحس بتقدير كبير. والتقدير ده بيزيد لو معاه هدية، يا سلام بقى لو حاجة هو محتاجها.
الصراحة إن الرجالة أسهل منّنا كتير فى موضوع أعياد الميلاد والاحتفالات والهدايا، الحق يتقال.. إنتى بس لو الصبح عملتى له فطار قبل ما ينزل الشغل وقولتى له كل سنة وأنت طيب، وعلى الغدا عملتى له أكلة بيحبها، واليوم عدّا من غير خناق أو زعيق مع الولاد، ممكن يغمى عليه من فرط السعادة.
لكن احنا كستات بنهتم بالمناسبات والاحتفالات وبيفرق معانا جدًا المجهود اللى الزوج بيعمله علشان يحتفل بعيد ميلاد الزوجة.
وفى كثير من الأحيان لما تقعد الزوجة توضب وتجيب هدية وتظبط احتفال مع أصحابه وتشوف يوم مناسب للجميع وكله يتم تمام بتبقى مستنية بقى كلام كتير وتقدير واحتمال زيادة فى مصروف البيت تقديرًا للمجهود الجبار اللى عملته، تلاقيه فى الآخر بيقول لها كلمتين بالظبط تَعّبتى نفسك وربنا يخليكى. والموضوع انتهى. حضرتك ثانية واحدة أنا بقالى أسبوع بظبط فى الخروجة دى وأصحابك غلبونى علشان أجمعهم كلهم، أيوه ما أنا قلت لك ربنا يخليكى أعمل إيه تانى!، وممكن تقلب خناقة كمان.
عزيزتى الزوجة.. الرجالة بيرضوا بأقل حاجة فى موضوع الاحتفالات وأعياد الميلاد دى، فلو عاوزه تعملى مجهود فى احتفال لازم تعرفى إنه مبسوط ومقدر بس مش طاير من الفرحة ومزقطط زى لو هو عمل لك، نحن مختلفون. وفى النهاية أحب أقول لزوجى العزيز كل سنة وأنت طيب وعقبال مليون سنة ومتستناش أى احتفال علشان عارفة إنها مواضيع ثانوية بالنسبة لك، وده مش معناه إنك تنتظر هدية علشان الظروف الاقتصادية اللى بيمر بها العالم مع ارتفاع البنزين والدولار وحاجات كتيرة أوى، فكفاية عليك أنا أحلى هدية، ولّا عندك اعتراض؟
