جوزك على ماتعوديه : طاطى للموجة (2 - 1)
رغدة أبورجب
فى موجة كده أول لما تيجى لازم تطاطى لها.. معلش الذكاء بيقول كده، وللموجة دى علامات بتكون واضحة وضوح الشمس للزوج، منها مثلًا البوز اللى مش بيكون مبرر بالنسبة للزوج، أو كلام من نوعية مبقتش تحبنى، انت اتغيرت، عمرك ما خرجتنى، أول أول انبارح بالليل قلت لى حاجة زعلتنى.. وقيس على كده كتير.
دى علامات بتكون مهمة وبتوضح إن الموجة جاية وإنك لازم تطاطى لحد ما تمشى بسلام.
وهنا بيفرق ما بين الزوج المحترف والزوج الجديد اللى لسه فى مرحلة الهواة.
نلاقى إن الزوج المحترف بياخد مكان فى البيت كده مدارى محدش يشوفه فيه وبيكون مستخبى كده، ولو حصل وانكشف المكان ده وقررت الزوجة إنها تفتح معاه أى نوع من أنواع المناقشات البيزانطية بيكون رأيه طبعًا إنك صح طبعًا وأنا مقصر معاكى نتيجة الشغل والظروف وإنى بحبك جدًا وإن حياتى جحيم من غيرك.. ساعتها ممكن النقاش يعدى بسلام. وعلى فكرة هى بتكون محتاجة فعلًا إنها تسمع الكلام ده وتشوفه فى عينك.
أما بقى لو حاولت مجرد المحاولة إنك تدخل فى النقاش معاها وتحاول إنك تدافع عن موقفك وإنكم لسه كنتوا خارجين مع بعض من يومين بس وإنك لسه جايب لها هدية تعبيرًا عن حبك لها الأسبوع اللى فات، وإن كلامها ده من وحى خيالها. يبقى قول على نفسك يا رحمن يا رحيم. ومن هنا يبدأ التسونامى.
وهى عبارة عن موجات من النكد المتتالى اللى بتجتاح البيوت كل فترة، ودى مش بيكون فيها أسباب واضحة طبعًا للزوج ولكن الزوجة بيكون عندها أسبابها اللى حنناقشها فى المقال القادم.
ومن هنا تبدأ الموجة وبيبان هنا الفروق بين الزوج المتمرس اللى بيطاطى لحد لما الموجة تعدى وما بين الزوج الهاوى الجديد اللى بيلبس الموجة فى وشه.
