جوزك على ما تعوديه.. الرجالة عاوزة روقة
رغدة أبورجب
فى نداء عالمى من الرجال إنهم عاوزين يتجوزوا زى روقة فى فيلم العار.
ليه عاوزين روقة؟ يا ترى علشان الدلع اللى كانت بتدلعه لزوجها؟ ولا علشان هى شخصية الزوجة البسيطة اللى ملهاش تطلعات؟ ولا فكرة إنها بتجهز له الحمام (اللى محدش عارف لحد دلوقتى بيتحضر إزاى؟)
ولا علشان بتسمع الكلام دون مناقشة؟ ولا علشان كل الأسباب دى مع بعض؟
طيب فى هذه الحالة مش عاوز الإندبنت ولا العاملة ولا المثقفة ولا صاحبة الشخصية القوية، ولا كل ده مع بعض.
أصل دى معادلة كيميائية صعبة لا يمكن تحقيقها خاصة فى ظل الظروف الاجتماعية الحالية.
كله عارف إن الراجل بيحب يدلع بس فى نفس الوقت بيحب المرأة القوية صاحبة الشخصية وده يتنافس مع شخصية روقة.
الحقيقة إننا كستات تعبنا ومش فاهمين متطلباتكم؟
بس لو حبيت شخصية روقة وعاوز تتجوز زيها لازم تعرف إنها حتكون شخصية معتمدة بشكل كلى عليك وإنك تنسى نهائى إنها شخصية مستقلة وصاحبة قرارات.
المجتمع أصبح قاسيًا جدا على المرأة وخلاها بمية راجل وده انعكس على شخصيتها فى البيت.
المهم إننا كستات محتاجين نعرف متطلباتكم علشان نرضيكم، بس روقة صعبة المنال محجوزة الصيف ده كله.
فممكن نشوف شخصيات تانية تكون متوسطة نقدر نتعايش معاها.
