جوزك على ما تعوديه.. المفاجآت تصنع المعجزات
رغدة أبورجب
زى ما اتفقنا إن فى اختلافات جوهرية بين الست والراجل، وده طبعا بيأثر على شخصية كل واحد فيهم.
الستات بيحبوا أوى التفاصيل، عكس الرجالة، تلاقى الستات تهتم بحاجات مستحيل إن الرجل يفكر فيها مش يهتم بيها.
علشان كده لازم تعرف وأنت بتتعامل معاهم إنهم كائنات مختلفة، وبما أنهم مختلفين حابة أقول لك إن المفاجأة بتعمل معاهم شغل جامد جدا، وممكن تخليك تحصل على امتيازات كتيرة علشان أنت بس عملت مفاجأة.
المفاجآت أنواع وأشكال يعنى ممكن تبتدى من بوكيه ورد توصل لسفرية أو هدية غالية كان نفسها فيها.
الفكرة هنا مش فى نوع المفاجأة، الفكرة إنك لما بتعمل لها هى بتحس إنها على بالك وإنك مشغول بأمرها وده إحساس ينعش العلاقة وبتخليها تشعر بحبك لها.
الخلاصة إن المفاجآت فعلا بتصنع المعجزات وتذوب الخلافات وتقلل التوتر اللى موجود فى العلاقة.
فاشخشخ جيبك وانزل هات لها أى حاجة كده بسيطة أو مش بسيطة إنت وذوقك واعمل لها أى مفاجأة حلوة.
