جوزك على ما تعوديه.. خد اللى بتحبه وتقبل عيوبه
رغدة أبورجب
ليه دايمًا بيكون عندنا تطلعات زايدة فى أى علاقة جديدة، ما هو تقريبًا نفس الأدمغة مع اختلافات بسيطة، أصله مش سنجاب وبنتعرف عليه..
طبيعى إنه بيتخانق وبيغضب وبيزعل، عادى ما هو بنى آدم طبيعى.
فا يا ريت بلاش التطلعات الزيادة فى العلاقات الجديدة، كل شخص بيكون ليه مميزات وعيوب بتختلف عن اللى قبله، بس مفيش علاقة مفيهاش مشاكل، بلاش المتطلبات المستحيلة.
إنك تقدر تتفهم وتعيش مع شخص تقدر إنك تتماشى وتتقبل عيوبه؛ دى حاجة حلوة جدًا.
متحاولش إنك تغير عيوب شريكك، الفكرة إنك تحاول تتأقلم وتعيش معاها، طبعًا لو أتحسّنت بتكون حاجة كويسة، فكرة إنك تاخد حد بتحبه على أمل إنك تغيره؛ دى فكرة أثبتت فشلها.
وبلاش فكرة إننا ندوَّر على ملايكة؛ لأن مفيش ملايكة على الأرض، وكل واحد عنده عيوبه، التعايش مع العيوب دى هو الحل.. وإنك تركز على مميزات الشخص دى حاجة حلوة بتخليك تنسَى العيوب وتتغافل عنها. الخلاصة؛ إننا نختار صح ونحب بعض زى ما إحنا بعيوبنا ومميزاتنا.
