جوزك على ما تعوديه.. أنا مش حعرف أكمل

أنا مش حعرف أكمل أصل إنتى تستاهلى حد أحسن منى، أول ما تسمعى الجملة دى أعرفى أنه بالبلدى بيخلع ومش عاوز يكمل فى العلاقه، سواء انتوا لسة فى البدايات أو حتى بعد الجواز.

اللى حيفرق أنه بعد الجواز مش حيقولك أنتى تستاهلى حد أحسن منى، لأنه ببساطة شايف نفسه أحسن رجل فى الكوكب، فاحيقول لك أنا مش قادر أكمل معنديش حاجة ممكن أديها لك أنتى والولاد، فا حمشى. 

طبعا الكلام ده يا إما بيكون وراه واحدة ست، أو إحساس إنه ثور فى ساقية وقرر يقف فجأة  طبعا ده معناه انك إنتى اللى حتشيلى الليلة لوحدك، وكلام الحب والغرام اللى كان بيقوله فى الأول ملوش أى لازمة.

هو طبعا بيهرب من الالتزام سواء كان الهروب ده فى أول العلاقة قبل الزواج أو بعد الزواج، اللى بيفرق بس إنك بعد الجواز بتكونى لبستى فى الحيطة وفرصك محدودة خاصة لو معاكى أطفال فا يا ريت وإنتى بتختارى حاولى إنك تختارى حد مسئول مش حيسيبك فى النص ويخلع وبالنسبة للرجال، يا ريت قبل ما تقرر إنك تخوض فى علاقة فكر أن موضوع الارتباط ده بيكون فيه مسئولية كبيرة بتقع عليك بحكم إنك راجل. الموضوع شبيه بالمباراة مينفعش توقف وتخرج فى نص المباراة لأنك ببساطة ممكن تخسر فريقك، طالما نزلت المباراة يبقى لازم تكملها، أو ما تنزلش من الأساس.

بنات الناس مش لعبه.