جوزك على ما تعوديه.. بلاش خناقة أول يوم العيد.. أبوس إيديكم

أهوه إحنا قبل العيد وبنبه عليكم من بدرى بلاش خناقة العيد، خليكم أذكى من الموقف وبلاش تنجرف للخناقة بالرغم من أنها فعلا بتكون مغرية.

موضوع خناقة العيد ده احتار فيه العلماء، محدش قادر يفهم بالظبط ليه لازم الخناقة تكون ليلة العيد، ما ألسنة طويلة قدامنا نتخانق فيها براحتنا من غير ضغط.

وبالرغم من عدم وجود تفسير واضح عن أسباب هذه الخناقه، ولا أهميتها فى مثل هذا التوقيت إلا أننا لازم نبطل نتخانق فى المناسبات والأعياد، أيوه ليه نتخانق فى العيد، المفروض أن العيد فرحة.

استمتعوا بإجازة العيد وبلاش نكد وبوز وتضيع للوقت. الإجازة أصلا قصيرة جدا وبعدها حيكون فى امتحانات، فا يا ريت كل واحد يكبر دماغه وميقفش عند الهيافات والكلام هنا للستات لأنها هى اللى غالبا ما بتركز فى الهيافات.

أما بالنسبة للرجل يا ريت بلاش تسيبهم فى البيت وتنزل تسهر يوم الوقفه وترجع على الفجر وأول يوم تروح عند الست الوالده تنام وتسيبهم قاعدين مستنينك تخرجهم. 

كل الحاجات اللطيفة دى معروفة وبتتكرر كل عيد وبتكون أحد أهم أسباب خناقة العيد. 

فا يا ريت نتعلم من أخطائنا ونتفادى المشاكل

وكل سنة وأنتم طيبين وعيد سعيد عليكم جميعا من غير خناقة العيد.