جوزك على ما تعوديه.. لما يطول فى الحمام مش معناها إنه بيعمل لك مفاجأة

قاعدة الحمام المطولة وغير المبررة من جوزك مش معناه نهائى إنه بيحجز لك يومين فى العين السخنة ولا بيحضر لك surprise party ولا حتى معناه إنه بيخونك، ولا إنه محتاج دكتور جهاز هضمى.

غاية ما هناك إن ده المكان الوحيد اللى ممكن تسيبيه فيه براحته ومش حتزعجيه بطلباتك.

فابيقرر إنه يلجأ للحمام كوسيلة للهروب والفصلان، فا بلاش التخيلات الواسعة إنه بيخونك أو بيعرف عليكى واحدة والكلام الكبير ده لأنه أبسط من كده بكتير.

وكمان بلاش تشطحى بعنان تفكيرك وتحسى إنه ممكن يكون مستخبى منك وبيعملك مفجأه من أى نوع، أحب أقول لك إن الحمام عمره ما كان مكان المفاجآت.

هو أصلاً مفيش أى فكرة مفيدة ممكن تكون بتعدى على دماغه فى الفترة دى. مجرد فصلان مش أكتر. لكن لو العكس حصل وطولتى حبتين فى الحمام، تلاقى القيامة تقوم والدنيا تتقلب عليكى والأسئلة تلف حوليكى وكأنهم مسكوكى فى كباريه مش فى الحمام.