جوزك على ما تعوديه.. لما تقول لك براحتك اعرف إنه كمين
رغدة أبورجب
فى كتير من الرجال بيعملوا اللى هما عاوزينه بصياعه ومن غير ما الست تزعل ولا يحصل أى نوع من المشاكل، وفى عدد لا يستهان بيه بردو بيعمل اللى هو عاوزه بس بيجيب لنفسه المشاكل والنكد لحد البيت.
لما تحس أن المشكلة جامدة بلاش عرق سى السيد يطلع.
وخليها تنزل المرة دى.
لما تيجى الست فى أى نقاش وتقول لك براحتك واعمل اللى أنت عاوزه، اوعى تعمل اللى أنت عاوزه ده فخ هى عاملاه ليك علشان تعرف حتختار إيه.
وطبعًا لو اخترت غير اللى هى عاوزاه يبقى نهارك ملوش ملامح واستعد للعاصفة.
أما إذا ربنا كرمك وفهمت الليله يبقى عديت مع اللى عدوا.
وخد بالك مرحلة براحتك دى مش بتكون أول مرحلة، ده أنت بتكون استنفذت فرص كتير أوى فا خد بالك أنها بتكون الفرصة الأخيرة قبل الطوفان.
موضوع براحتك بالنسبة لها ده بيكون اختبار لحبك وتفهمك لها ومكانتها عندك، كل الاختيارات دى بتكون فى راسها وهى بتقول لك براحتك.
فالنصيحة إنك أول لما تسمع براحتك، قول لها براحتك إنتى واللى بيريحك أنا حعمله، وافهم أنها بتكون عاوزاك تختارها هى.
