جوزك على ما تعوديه.. لما ينكشك.. اتنكشى
رغدة أبورجب
بعد أى خناقة بينكم قرر الزوج اللذوذ إنه ينكشك بأى شكل علشان يجر كلام معاكى، اتنكشى وجرى معاه الكلام.
ده بيبقى نوع من أنواع الاعتذار الضمنى عن الموقف.
فى كتير من الرجالة بيرفضوا فكرة الاعتذار وكلمة أنا آسف، فا بيقرروا الاعتذار بطريقتهم، وهى الكلام عادى بدون الخوض فى تفاصيل الخناقة، وممكن يكون كلام فى أى موضوع أو طلب بس بشكل لطيف. ده بيعد بالنسبة لهم اعتذارًا، هو فى الحقيقة بيكون نكش، أيوه هو بيحاول ينكشك علشان تتكلموا بعيد عن الخناقة.
وطبعًا مش محتاجة أفهمك إنه لما ينكشك أو حتى يحاول لازم تتنكشى، لأنه مش حيكررها تانى وساعتها حتفضلى مقموصة غالبًا للأبد،
فا أى محاولة اتشعبطى فيها، ويبقى كأنك كبرتى دماغك، لكن فى الحقيقة انتى انتهزتى الفرصة.
وعلى فكرة الستات اللى بتعمل كده بتبقى عاقلة وفاهمة كويس العرض اللى بيتعرض عليها وبتعرف تقيم الموقف.
وبجد من ناحية تانية للموضوع، الكلام وتجاهل المشكلة فى حالة النكش، ده بيعزز الثقة بين الزوجين وبيخلى فيما بينهم رصيد بيتيح لكل منهم الرجوع عن الخناقة بسهولة، من غير كرسى الاعتراف اللى بيكرهوا أغلب الرجال،
فا أول لما تحسى إنه بيحاول يجر معاكى أى نوع من الكلام بعد الخناقة، افتحى معاه كل المواضيع اللى ممكن تتفتح ساعتها وحطى فى اعتبارك إن دى طريقته فى تخطى الموضوع.
