رمضان فى مصر حاجة تانية (1)
منى رضوان
بنستنى رمضان من السنة للسنة، نفرح بقدومه ونودعه على أمل عودته واحنا فى أحسن حال.
قبل بداية رمضان رسميًا فى بداية غير رسمية أول ما بيتحدد فلكيًا امتى أول يوم ومع هذه اللحظة تبدأ كل الناس تسمع أغانى رمضان المميزة التى حُفرت فى ذكريات كل واحد فينا.
على رأس قائمة الأغانى دى أغنية مرحب شهر الصوم لعبدالعزيز محمود اللىّ فيها بيقول:
مرحب شهر الصوم مرحب.. لياليك رجعت فى أمان، بعد انتظارنا وشوقنا إليك.. جيت يا رمضان.
أما أغنية وحوى يا وحوى دى فهى أقدم أغنية على الإطلاق لأنها مستوحاة من العصر الفرعونى، الأغنية من كلمات محمد حلمى المانسترلى وألحان وغناء أحمد عبدالقادر.
مفرداتها زى وحوى يا وحوى إيوحا كانت جملة بيستخدمها الفراعنة للترحيب بملكتهم إياح حتب أو قمر الزمان وكانوا بيغنوها بمعنى مرحبًا يا قمر لأن وحوى معناها مرحى، وإياح يعنى القمر.
أما أغنية افرحوا يا بنات دى غناها الثلاثى المرح وهى من علامات دخول رمضان.
افرحو يابنات يلا وهيصوا، رمضان أهو نور فوانيسه، ياحلاوة التين الله الله، والقمر الدين الله الله وأكياس النوقل وقراطيسه.
ولا يمكن ننسى أغنية هاتوا الفوانيس الجميلة جدًا لمحمد فوزى: هاتو الفوانيس يا ولاد هاتوا الفوانيس هانزف عريس يا ولاد.
هيكون فرحوا تلاتين ليلة هنغنى ونعمل هوليلة وهنشبع من حلوياته.
وأغنية تانية جميلة للثلاثى المرح من أشهر ما غُنى للشهر الفضيل وهى أغنية أهو جه يا ولاد أهوه جه يا ولاد.. هيصو يا ولاد أهوه جه يا ولاد.. زقططو يا ولاد، فى كل عام ويانا معاد وعمره ما بيخلفش معاد.
وطبعًا أغنية والله بعودة يا رمضان لمحمد قنديل: والله بعودة يا رمضان، يا شهر العبادة والخير والسعادة والرضا والغفران.
يا مجمع قلوبنا على سنة حبيبنا وبهدى القرآن
من طلعة هلالك غمرنا جلالك آيات من جمالك من نعم الرحمن، على صومك نوينا ودعينا وصلينا وهبت علينا نفحات الإيمان والله بعودة والله يا رمضان.
أما الأقرب إلى قلبى فهى أغنية محمد عبدالمطلب - رمضان جانا وفرحنا به بعد غيابه وبقاله زمان، غنوا وقولوا شهر بطوله غنوا وقولوا أهلا رمضان.. رمضان جانا.
بتغيب علينا وتهجرنا وقلوبنا معاك وفى السنة مرة تزورنا وبنستناك.
من امتى واحنا بنحسبلك ونوضبلك ونرتبلك.
ومع قرب رحيل الشهر الفضيل ومع تمام البدر معلنًا أنه هيودعنا نغنى مع شريفة فاضل تم البدر بدرى والأيام بتجرى، والله لسة بدرى والله يا شهر الصيام، حيانا هلالك، ردينا التحية، زهانا جمالك بالطلعة البهية، دى فرحة سلامك والا وداع صيامك، والله لسه بدرى والله يا شهر الصيام.
كل سنة وانتم طيبين وأهلًا بيك يا رمضان...ورمضان فى مصر فعلًا حاجة تانية والسر فى التفاصيل.
