جوزك على ما تعوديه.. خليك ناصح
رغدة أبورجب
إنتى متعصبة ليه؟ إيه اللى مزعلك؟ ما لك فيكى إيه؟
كل دى أسئلة بيسألها الراجل لمراته فى وقت هى فعلا بتكون زعلانة ومتعصبة من حاجات عبيطة، طبعا هو مشكور على سؤاله، لكن فى الحقيقه هى فعلا معندهاش إجابة مقنعة عن سبب توترها.
غالبًا بتكون حاجات صغيرة مع هرمونات متلخبطة، ده بيوصلها للحالة اللى بتكون فيها.
أنا عارفة إنك كرجل مش بتفهم الحالة دى وإنك بتشوفها مجنونة، بس هى فعلا بيكون غصب عنها، ودى حالة بتمر بيها أغلب الستات.
النصاحة بقى فى مثل هذه المواقف هى البعد عن الدخول فى التفاصيل أو فى أى نوع من أنواع المهاترات اللى ملهاش معنى، يعنى بلاش القرارت المصيرية، أو المواضيع الصعبة اللى بتكون محتاجة نقاش عميق، لأن النقاش كده حينتهى بخناقة كبيرة بينكم.
اختيار الوقت عامل مهم جدا للنقاش، فلما تلاقيها فولتها عالى اجرى على قد ما تقدر لحد لما تظبط مودها على رأى الهضبة.
بعد المرحلة دى كل حاجة بتطلبها منها بتعملها وبتقدر جدا إنك احتويتها فى توترها.
النصاحة إنك تبعد عن الموجة لما تكون عالية، مش تخش فيها برأسك وتفتكر إن دى الشطارة.النصاحة فن.
