جوزك على ما تعوديه.. ابعدى عنه وقت الماتش

الفرجة على الماتشات مع الرجالة مأساة كبيرة جدا، تلاقيه عمال يتكلم مع اللاعيبه عبر التليفزيون وكأنه معاهم فى الملعب، حضرتك واللهى العظيم هما مش سامعينك.

وياسلام بقى لو حد جاب جون، تلاقيه بقى أخد وضع معين على الكنبه مع ابتسامه خفيفة على الوش ويقول: أنا قلت لك الولد ده موهوب وحيجيب جون»، حضرتك قاعد على الكنبه بتاكل لب أو على القهوه مع أصحابك بتشرب شاى وآخر مرة لعبت فيها كورة جالك شد عضلى قعدت فيها أسبوع فى البيت.

دور المحلل الرياضى ده بيكون جزء من شخصية أغلب الرجالة، وطبعا لو اتكلمتى أو علقتى أى تعليق على الفريق معجبهوش ممكن يؤدى الى خناقة قوية بينكم، فالأفضل أن تلتزمى الصمت، أو الأفضل إنك تسيبى البيت خصوصا لو فريقه خسران، خسارة الفريق بتنعكس على طول على البيت، اللى هو أنتى برضو فابعدى عنه وقت الماتش وبعد الماتش خصوصا فى حالة خسارة فريقه.

بالنسبة بقى ليك عزيزى الرجل، يا ريت تعرف إنك كمشاهد للمباراة صوتك مش مسموع بالنسبة لهم كاللاعيبة، وإنك مش مدرب الفريق ولا حتى المدرب المساعد، وآخر مرة لعبت فيها كورة كان من أكتر من ست سنين، فأتفرج وأنت ساكت وملكش دعوة بالست اللى قاعدة جانبك هى ملهاش فى الكورة وقاعدة جنبك جبر خاطر، فمتطلعش غضبك عليها.