جوزك على ما تعوديه.. وطى صوتك
رغدة أبورجب
يا جماعة الصوت العالى ده أهم سبب للخناق، وأغلب الرجالة ممكن تكون بتتكلم عادى بس صوتها عالى فا يتقلب الموضوع خناق.
إيه فكرة إن مصر كلها تكون سامعة أنت بتقول لى إيه؟
حتى لو مش حاجة غلط أن حد يسمعها، إيه الفكرة أن النادى كله مثلا يبقى سامع الحوار؟!
وبعدين فكرة الصوت العالى دى بتخلى اللى قدامك يقول لك وطى صوتك فا تتعصب أكتر وتقلب خناقة كبيرة. طب ما من الأول بقى ناخد بالنا من فكرة الصوت اللى ممكن تودينا للمشاكل برجلينا.
دايما عزيزى الرجل وأنت بتتكلم مع أى ست لازم صوتك يكون واطى وفى نفس الوقت مسموع مش (نحنحة) الصوت المعتدل.
حتى زمان كنا بنشوف الرجالة وهى بتكلم الستات فى الأفلام صوتها مش باين، عكس الأيام دى تلاقى الواحد بيكلم مراته والمول كله سامع الحوار، وحتى لو فى التليفون تلاقى صوته طالع من السماعة والناس اللى جنبها سامعين الحوار، وطبعا مش محتاجة أشرح لكم إنها لو قالت له براحة شوية، أو وطى صوتك، حتقوم الحرب ما بينهم.
حقيقى هو مش بيكون بيتخانق بس ده مش مبرر نهائى للصوت العالى، يمكن انتشار فكرة calls لإنهاء حاجات فى الشغل، خليتهم يبقى صوتهم عالى علشان يسمعوا بعض فى الميتنج؟ مش عارفة السبب إيه. بس اللى أنا فاهماه وعارفاه كويس هو إنك لازم توطى صوتك.