جوزك على ما تعوديه.. حتعالج على حسابى و الاّ إيــــه

إحنا بنتاخد من بيت أبونا وبيدفع لينا مهر وشبكة ومؤخر, الجديد بقى إننا عاوزين  تأمين صحى شامل، يشمل العلاج من جميع الأمراض اللى ممكن تتعرض لها الزوجة.

زى الشركات كده لما بتأمن على موظفيها، ما هى الشركة اللى بنشتغل فيها بتكون عارفة إن فى احتمالات إصابات كتيرة تطرأ على موظفيها فبتوفر لهم تأمين صحى يتكفل بمصاريف إشاعتهم وتحاليلهم وأدويتهم وكل ما يخصهم فى مرحلة العلاج.

نفس الفكرة بالظبط هنا فى الجواز حضرتك حتتكفل بالتأمين الصحى الشامل وذلك نظرًا للإصابات والأمراض اللى ممكن تتعرض لها الزوجة المسكينة أثناء الزواج وتربية أحباب الله.

دى مذاكرة الدراسات لوحدها مع هذا الجيل كفيلة برفع ضغط الدم وعمل ضربات سريعة للقلب.

ناهيك بقى عن باقى المواد، ده طبعًا غير طلبات ورغبات الزوج المسكين اللى مش بيطلب أى حاجة.

لذا أحب أن أنوه على ضرورة توفير التأمين الصحى الكامل للزوجات، وكمان الحرص على صحتهم العامة.

ويا سلام بقى لو الزوج اهتمّ ودفع العلاج التجميلى ساعتها هى وهو حيكونوا مبسوطين وبينعموا بحياة هادئة وحتى الدراسات مش حتقدر تعمل معاهم حاجة.