جوزك على ما تعوديه.. الراجل من حقه كام درفة فى الدولاب؟

 بُصُّوا بقى إحنا من حقنا أكتر من نص الدولاب، وده عُرف ماشيين عليه من سنين السنين..  مش حتيجى أنت تتخانق وتعمل لنا مشاكل وفاكر إنك حتغير العهد.. 

أيوه إحنا مفتريات.. 

صدّقونى الموضوع مش افترا خالص، غاية ما هناك أن هدومنا وتفاصيلنا إحنا كسِتّات كتيرة جدًا، وده نابع من شخصياتنا..  أمّا أنت كراجل تفاصيلك بسيطة، وده نابع من شخصيتك، يبقى إذا هدومك بسيطة ومش محتاجة أماكن كتيرة.. شفت الموضوع سهل ازّاى..

وبعدين إحنا لو قسّمنا الدولاب قسمة العدل مش حتلاقى حاجة تحطها فيه وممكن تضطر تشترى وكمان انت حاجتك سهلة وبسيطة زى ما قلنا قبل كده..

شفت بقى إننا خايفين عليك وعلى مصلحتك. يا ريت بقى موضوع قسمة العدل فى الدولاب أو الدريسنج دى ميتفتحش تانى علشانك أنت، لأنك كل ما حتطالب بالمزيد حتلاقى بيتاخد منك أماكن..

فا ارضَى بالمكتوب ومشّى حالك.. 

الموضوع ده مقفول من زمان من أيام الجدود، حتلاقى جدتك كانت واخدة أكتر من نص الدولاب وجدك يا حبيبى كان عنده ضرفة واحدة وكان راضى ومات وهو نفسه ياخد ضرفة تانية بَس على مين..

الموضوع ده حسّاس أكتر من أزمة الدولار، فا حرصًا على صحتك العامة ارضَى وخليك قنوع.