جوزك على ما تعوديه... إنتى مش مقصرة

ساعات كتيرة بتحس السّت إنها مقصّرة ومش قادرة تقوم بواجباتها على أكمل وجه سواء فى البيت أو مع الزوج أو فى الشغل أو حتى مع الولاد.

الفكرة إنها بتحس الموضوع ده وبيزيد مع كل المشاكل والحاجات المفروض تتعمل.

سيدتى العزيزة أحب أقول لك إنتى مش مقصّرة خالص، الفكرة إنك مش ملاحقة، وده نتيجة كم الحاجات اللى المفروض تعمليها. وده شىء طبيعى؛ خصوصًا مع الروتين اليومى والضغوطات الحياتية.

أرجوكى خدى الأمور ببساطة شديدة، واعملى اللى تقدرى عليه.

أهم حاجة تفهمى كويس إنك مش مقصّرة وإنك بتعملى أقصَى مجهود حتى ولو فى زوجات تانية بتعمل أكتر منك، كل واحد حسب طاقته وحسب أولوياته.

وحتى لو الطبيعى إنك بتقومى بكل الحاجات وجِه عليكى وقت مش قادرة تعمليهم، عادى خدى الأمور ببساطة كل إنسان بيحتاج يرتاح ويفصل. متعقبيش نفسك إنك تعبانة أو حتى ملكيش مزاج.

إنتى ست قوية وبتعملى مجهود جبار، عزيزتى كل إنسان بيعدى عليه فترات خمول وبيحتاج لشحن طاقته، متبخليش على نفسك بأنك تمرّى بنفس الإحساس وتتمردى على كل الضغوطات لشحن طاقتك والعودة مرّة أخرى إلى حياة الخلاط.