جوزك على ما تعوديه... انت بتتشيك لمين؟
رغدة أبورجب
فى أوقات كده الواحدة بتحس اللى هو خير، أيوه حضرتك فى إيه؟
طبعًا النظافة من الإيمان والشياكة مهمة والبرفان أهم وكله علشان الشغل وأكل العيش وشكلى قدام الناس والتيم وكلام من هذه النوعية.
طبعًا احنا بنقول حاضر وطبعًا وخلاص.
وشياكة الزوج تدل على إتقان الزوجة فى اختيار ملابسه والاهتمام بجميع تفاصيله.
بس لما يبقى الموضوع فاق الحدود يبقى لازم نقف ويكون لينا صوت.
لما يكون نازل البنك فى مشوار اعتيادى ونلاقى مستوى الشياكة والجزم اللى بتتلبس والحزام اللى بيظهر فى المناسبات والأعياد القومية والذى منه طلع يبقى لازم نقلق.
حتقول لى يعنى ننزل مبهدلين علشان نرضيكم؟ لا طبعًا مش ده القصد بس الفكرة لما تبقى زيادة عن اللزوم لابد أن تثير الشكوك.
أصل معشر الرجال مش كلهم طبعًا بس شويه منهم مش قليلين بيحبوا يكونوا تحت دايرة الضوء واهتمام من الكثيرين. والكلام هنا مش بس عن اللبس والشياكة المتناهية فى الشغل، فى فقرة تانية مهمة أوى هى ريحة البرفان اللى بتكون فى كل أرجاء المنزل لمجرد نزوله من البيت متجهًا لأى مكان وساعات كتيرة بتمتد لمدخل العمارة.
فى حاجة معينة حضرتك؟ خير؟
لذا حرصًا على العلاقة الزوجية وعليكم احذروا الوقوع فى الفخ، اتشيكوا والبسوا وكله بس بالعقل يا مستر.
