جوزك على ما تعوديه.. دى ركنة دى؟!

 طبعًا ده استفسار كل زوج مصرى بيسأله بعد ما مراته حبيبته تركن العربية..

آه على فكرة إجابة السؤال أيوه دى ركنة جميلة جدًا ومناسبة للظروف، أصل أنا لو قعدت من هنا لبُكره أقنع الرجل العزيز أنى بعرف أسوق وأنى بعرف أركن كويس مش حيقتنع.. 

فا خلاص أنا مش بعرف أسوق وبالتالى مش بعرف أركن، بَس الظروف كتبت عليّا أنى لازم أسوق علشان المَدرسة والشغل والتمارين، ولو سواقتى وركنتى مش عاجبينك أنا مش مضطرة كمان أركن على مزاجك.. 

ولو مضايق أوى أوى هات سواق..

أعتقد أن بعد كده ممكن تاخد منّى العربية وتركنها أنت، وحتعجب أوى بسواقتى.

أنا بحاول أكون واقعية معاك، إحنا كستات بنعمل حاجات كتيرة أوى وإحنا سايقين وطبعًا ده مش صح، بَس هى دى الحقيقة، فا بينتج عن ده عدم تركيز فى السواقة وطبعًا ده مش صح وطلعت علينا الشائعة إن الستات مش بتعرف تسوق، لكن لو أخذنا الفرصة حتنبهر عزيزى الرجل، صدقنى غصب عننا وأقول لك حاجة تانية إحنا ساعات كتيرة أوى بننسى نور العربية ومرّات كتير بننسى العربية نفسها مفتوحة وحاجات تانية كتير أوى.. 

فا فى موضوع العربية أنت معاك حق بَس حقيقى مفيش حل؛ الإرهاق والتعب بيعملوا أكتر من كده.