اللهو الخفى
منى رضوان
اللهو الخفى هو زعيم عصابة اللهو الخفى اللىّ خطفوا عاطف السكرى فى مسرحية العيال كبرت.. لما خطفوه كده وكده طبعًا كانوا عايزين يثنوا أبوهم عن أنه يسيب البيت ففبركوا قصة الخطف.
اللهو الخفى شخصية كانت خفية.. أم عاطف وأبوه مشافوهوش بس سمعوا صوته ودى كل معلوماتهم عنه.. لذا هو اللهو الخفى.
شخصية اللهو الخفى مظهرتش بشحمها ولحمها وكانت undercover بس هى موجودة فى المسرحية وكذلك الحياة.. فى شخصيات كده بالضبط، موجودة بس هى مش ملموسة بالمرة.
خد عندك مثلًا يا سيدى: الصاحب أو اللىّ هو المفروض صاحب ولكن دايمًا وأبدًا عنده ظروف، الغائب الحاضر، مبيظهرش غير للاستمتاع أو الاستفادة فقط.
يعنى بتاع الخروج والانبساط والفرفشة أو لو محتاج منك خدمة أو مشوار أو له شوق يلعب طاولة على القهوة ويفرفش بقعدة مع الشباب وسهرة صباحى.
ويوم واتنين وتخلص حاجتى من جارتى ويختفى.. يعدى شوية وقت ويشوفك فيسلم عليك أكنك أعز أصحابه وبايت معاه طول عمرك ويحزق جامد ويقولك لازم نتقابل وواحشنا يا جدع ويلا ساحل يوم الخميس أو بكره نلعب كورة.. ويجى بكرة ويجى الخميس ويجى الصيف ويخلص وهو فى طى النسيان، اللهو الخفى ده شخصية مفيش بينك وبينها أى توقعات ولا أى مشاكل أو حتى خيبة أمل أو أدنى زعل، لأنه بيقول الكلمتين دول ويرووووووح منعرفلوش طريق وبالسلامة يا حبيب قلبى.
الشخصية دى بتبقى شخصية الإنسان (الزيبق) وده وقت الأزمة بيلبس طاقية الإخفا وبيبقى سراب وملوش أثر، يختفى وقت الشدة ولما الشدة تزول يقولك مقولتليش ليه ده إحنا إخوات وظهرنا فى ظهر بعض، وده عادة أحب أشوف ظهره بس وهو واخد الباب فى إيده.
أكتر ما يميز شخصية اللهو الخفى أنه عنده قدرة كبيرة على البجاحة.. يعنى هو عمره ما بيعمل أى واجب مع حد ولا يجامل ولا حتى يرد مجاملة، إنما بكل بجاحة يقول إنه مكانش العشم كذا وكذا وكذا.. عشم مين يا لهو؟ ده أنت عمرك ما وقفت جمب حد ودايمًا عندك ظروف وحواراتك لا تنتهى.
أفضل التعامل مع البنى آدم اللهو الخفى هو عدم التعامل من أصله، الشخصيات دى الاستثمار فيها بالوقت أو بالمجهود مضيعة حقيقية للعمر وإهدار لطاقة أولى تتحط فى أى شىء تانى.
لما عاطف السكرى رجع من الخطف بتاع العصابة أبوه عرف إن القصة كلها متفبركة وده يقولنا إيه؟ إن اللهو الخفى مفقوس حتى واحنا مشاهدين كنا فاهمين القصة.
يذكرنى اللهو الخفى بالناس اللىّ عاملة الأكاونت بتاعها على صفحات التواصل الاجتماعى مقفولة ومع ذلك بيشتكوا 24 ساعة من أن الناس مش متجاوبة معاهم، إحنا بس مش عارفينكم، مش عارفين غير إنكم اللهو الخفى.
