جوزك على ما تعوديه.. الرجل النكدى

هو فى راجل نكدى يا جماعة؟ أيوه طبعًا فى ..أنتوا على طول تحبوا تنافسونا على أى حاجة نتألق فيها... منتشر جدًا على فكرة وموجود فى أغلب الخروجات وعلى طول بيسحب الأوكسجين من الجو.

والراجل ده يا عينى تلاقى مراته غلبانة معاه وبتحاول تعيش وتعدى الدنيا بس على مين ده بينكد على كل كبيرة وصغيرة فى الدنيا، مثلاً الأكل مش مظبوط نلبس نكد موقف بسيط يحصل ومش مستاهل ننكد تلاقيه هوب لبس وش النكد وتقمص الدور وعاشه وقلب الدنيا. وعلى فكرة هو فعلا بيبقى الموضوع مش مستاهل والدنيا بسيطة. دايما تقولوا إن الستات هى اللى نكدية بس الحقيقة أن الرجالة كمان عندهم قدر كبير من النكد غير المبرر والسريع كمان فى نفس الوقت.

يعنى تبقى الدنيا تمام والجو ظريف تلاقى حد مثلاً كسر عليه وهو سايق،يتعصب ويتكدر وتبقى خروجه سودا علينا كلنا.أى حاجة ممكن تشعل أعصابه وينكد عليها، وطبعًا لو الست قالت له بطل نكد وكبر دماغك تبقى ليله سودا على دماغها وتتقلب الخناقة عليها هى.

فا لو سمحتوا اللى بيته من الإزاز ميحدفش الناس بالطوب. 

وكمان لازم تعرف عزيزى الزوج إنك تكبر دماغك وأن مش كل حاجة نعمل عليها موال ومشكلة وحوار فى حاجات كتيرة لما بنكبر فيها دماغنا بتعدى أسهل، وأن النكد ده عدوى ممكن تنتشر فى البيت،وساعتها مش حتقدر تقف أمام مراتك فى النكد لأننا أقويا أوى فى الحتة دى. فالنتيجة مش حتكون فى صالحك ف كبر دماغك وخليك فرش وفرفوش.