بلية بتاع الـIT
منى رضوان
فى وظايف كده دايمًا حواليها انطباعات، ومنها ما هو غير صحيح- وظيفة بتاع الـ IT خير مثال لذلك.
أولًا بتاع الـ IT ده مش رسالته فى الحياة تستيپ الـ Windows وبس، أنا اتعقدت من النقطة دى تحديدًا ووصلت لمرحلة تغيير الشغلانة علشان المجتمع مش فاهم وظيفتى.
ثانيًا بتوع الـ IT دول ولاد ناس زيّكم وبنى آدمين مش سلاحف.
مهنته ساعات بيبقى فيها دراية بالسوفتوير بس ده مش معناه أنه ماشى بشنطة سيديهات.
وهو مش هاكر يقدر يهاك أى حاجة لحبايبه أو يرجّع أى حاجة اتهاكت منهم وطبعًا الهاكينج ده ضد مبادئ الآيتهاوية الشرفاء.
مش معنى إنه شغال فى الـ IT إن عنده أجمد anti virus فى فلاشة فى جيبه.
ولا كونه شغال فى هذه المهنة معناه أنه يبقى فاهم فى كل حاجة بزراير وشاشات وعارف كل أنواع الموبيلات والتليفزيونات والكومپيوترات. هو إنسان مش Apple Man ولا رجل الأندرويد الأخضر.
وأحب أوضّح نقطة إن عادى ميكونش عنده كل اللعب والأفلام على هارد ديسك كبير وماشى بيوزعهم على الشعب، الحاجات دى بنشتريها زيّنا زيّكم على فكرة.
بتاع الـ IT بيعمل restart عادى لأى حاجة ممكن تحتاج لأنه فى الآخر ده جهاز ممكن يحصل فيه أى error. فلما يقولك اعمل ريستارت متخدهاش بنفسنة هو مش بيوزعك.
بتاع الـIT ده له تخصصات محددة، مش علشان بتاع IT فيبقى عارف كل ما له علاقة بالتكنوچيا الصوتية والمرئية والمسموعة، دى وظيفة زى الدكتور فيها تخصصات مش سلق بيض. ينفع تروح لدكتور أنف وأذن علشان يعالجك من مشكلة فى عينك؟ أو ينفع دكتور جلدية يولّد واحدة فى التاسع؟ تخصصات يا أخونا أقسم بالله.
مش علشان بتاع الـ IT يبقى معاه عدة الشغل وكابلات ووصلات وشواحن لاپ توپ وتليفونات.
بتاع الـ IT مش مذيع فى البرنامج الأوروپى وبيبرطن إنجليزى طول الوقت، الوظيفة فيها مصطلحات كتير بالإنجليزى بس هو مش خواجة.
لمّا تكلم بتاع الـIT تقوله عندى مشكلة ويقولك افتح ticket متحسّسوش إنه شتمك وجاب سيرة شجرة العيلة، الشغلانة دى شغلانة فيها إحصاءات عن نوع المشاكل اللى بتواجه المستخدمين فتقبل القصة وافتح التكت من غير غضاضة.
ولمّا مشكلتك تتحل إبقى بلغه يا ريت، مش تقعد تصوّت لمّا المشكلة تحصل ولمّا يحلها معاك تعمل عبيط!.
بتنسى الپاسوورد بتاعتك أو بتكتبها غلط كتير فالجهاز ميفتحش، أنا إيش أخششنى؟! بتصب جمّ غضبك عليّا ليه؟!
النسيان من سمات البشر عادى مش عجبة!
نهايته: بتاع الـIT والله إنسان مش زُحلفة ولا مَكنة ولا روبوت من كوكب اليابان الشقيق.
خصيمكم النبى حبّونا شوية وافهموا مهنتنا إحنا ولادكم برضه والضفر ميطلعش من اللحم أبدًا.
